Nangpili ni Jesus iti Sangapulo ket Dua nga Apostol

Kalpasan ti agarup maysa ket kagudua a tawen a panangaskasaba ni Jesus, adda napateg a desision a masapul nga aramidenna. Siasino dagiti pilienna a makipagtrabaho kenkuana? Siasino dagiti sanayenna a mangidaulo iti kongregasion Kristiano? Tapno makapagdesision ni Jesus, nagpatulong ken Jehova. Napan nga is-isuna iti bantay ket nagpatnag a nagkararag. Kabigatanna, inayabanna ti dadduma nga adalanna ket nangpili iti 12 nga apostol. Asino kadakuada ti malagipmo? Isuda da Pedro, Andres, Santiago, Juan, Felipe, Bartolome, Tomas, Mateo, Santiago nga anak ni Alfeo, Tadeo, Simon, ken Judas Iscariote.

Ti Sangapulo ket Dua ti kaduana a nagbibiahe. Idi nasanayna idan, imbaonna ida a mangasaba. Inikkan ida ni Jehova iti pannakabalin a mangparuar kadagiti demonio ken mangpaimbag kadagiti masakit.

Imbilang ni Jesus kas gagayyemna ti Sangapulo ket Dua, ken nagtalek kadakuada. Imbilang ida dagiti Fariseo kas ordinario a tattao ken awan adalna. Ngem sinanay ida ni Jesus para iti trabahoda. Kadua ida ni Jesus kadagiti kapapatgan a pasamak ti biagna, kas idi sakbay a matay ken idi napagungar. Kas ken Jesus, taga-Galilea ti kaaduan kadagiti Sangapulo ket Dua. Adda asawa ti dadduma kadakuada.

Imperpekto dagiti apostol ken nagkamalida met. Adda dagiti tiempo a dida pampanunoten ti ibagada, kamali dagiti desisionda, ken saanda a makaan-anus. Nagriririanda pay no asino ti kangatuan kadakuada. Ngem nasingpetda ken ay-ayatenda ni Jehova. Kalpasan a natay ni Jesus, nagbalinda a kaunaan a miembro ti kongregasion Kristiano ken nagpateg ti akemda iti dayta.