Ania ti Panagdaydayaw?

Ti panagdaydayaw mabalin a kayatna a sawen “ti aramid a mangipakita iti respeto ken ayat iti maysa a dios.” Iti Biblia, ti sasao iti orihinal a lengguahe a naipatarus kas “panagdaydayaw” mabalin a kaipapananna ti panangipakita ti maysa a tao iti nauneg a respeto, wenno panagpasakup, kadagiti parsua. (Mat. 28:9) Mabalin met a tukoyen dagita a sasao ti narelihiosuan nga aramid para iti Dios wenno didiosen. (Juan 4:23, 24) Ti kaipapanan dagita a sasao ket depende iti konteksto.

Ni laeng Jehova, ti Namarsua ken Kangatuan iti Uniberso, ti maikari iti naipamaysa a debosiontayo. (Apoc. 4:10, 11) Agdaydayawtayo ken Jehova babaen ti panangipakitatayo iti respeto iti kalinteganna a mangituray ken ti panangidaydayaw iti naganna. (Sal. 86:9; Mat. 6:9, 10) Iti libro nga Ezekiel, masansan a naitampok dagitoy dua a tema​—ti kalintegan ni Jehova a mangituray ken ti naganna. Ti sasao a “Kangatuan nga Apo Jehova” ket namin-217 a nausar iti laeng libro nga Ezekiel, ken 55 a daras met ti “maammuanyonto a siak ni Jehova” ken ti dadduma pay nga umasping iti dayta.​—Ezek. 2:4; 6:7.

Ngem saan la a basta rikna ti panagdaydayawtayo, ta ti pudno a panagdaydayaw ket napakuyogan iti aramid. (Sant. 2:26) No idedikartayo ti biagtayo ken Jehova, ikaritayo nga iti amin a paset ti biagtayo, agtulnogtayo kenkuana kas ti Kangatuan nga Agturay ken ipakitatayo ti nauneg a respeto iti naganna. Lagipenyo nga iti insungbat ni Jesus iti maikatlo a sulisog, inkonektarna ti panagdaydayaw iti “sagrado a panagserbi.” (Mat. 4:10) Kas agdaydayaw ken Jehova, magagarantayo nga agserbi kenkuana.a (Deut. 10:12) Ipapaaytayo ti sagrado a panagserbi iti Dios no makiramramantayo kadagiti aktibidad a direkta a konektado iti panagdaydayawtayo ken agkasapulan iti panagsakripisio. Ania dagita?

Adu ti pamay-an a maipaaytayo ti sagrado a panagserbi, ket napateg amin dagita ken Jehova. Mangipapaaytayo iti sagrado a panagserbi no mangasabatayo, agkomentotayo kadagiti gimong iti Kingdom Hall, ken tumulongtayo a mangmantener ken mangibangon kadagiti paggigimongantayo. Mangipapaaytayo met iti sagrado a panagserbi no makipasettayo iti panagdaydayaw ti pamilia, suportarantayo ti trabaho a panangsaranay kadagiti agkasapulan a kapammatiantayo, agboluntario kadagiti kombensiontayo, wenno agserbitayo iti Bethel. (Heb. 13:16; Sant. 1:27) No iyun-unatayo ti nadalus a panagdaydayaw iti isip ken pusotayo, mangipapaaytayo iti “sagrado a panagserbi iti aldaw ken rabii.” Pagragsakantayo ti agdaydayaw iti Diostayo a ni Jehova!​—Apoc. 7:15.