PANANGIRUGI ITI SARITAAN
LEKSION 5
Kinataktika
Prinsipio: “Kanayon koma a makaay-ayo ti sasaoyo.”—Col. 4:6.
Ti Inaramid ni Pablo
1. Buyaem ti VIDEO, wenno basaem ti Aramid 17:22, 23 sa sungbatam dagitoy a saludsod:
Ania ti narikna ni Pablo kadagiti di umiso nga aramid ti relihion a nakitana idiay Atenas?—Kitaen ti Aramid 17:16.
Imbes a kontraenna dagiti taga-Atenas, kasano a siaannad nga inusar ni Pablo dagiti patpatienda tapno maikasabana ti naimbag a damag?
Ania ti Masursurotayo ken Pablo?
2. Dakdakkel ti posibilidadna a denggendatayo dagiti tattao no siaannad a pilientayo dagiti ibagatayo ken no kasano ken kaanotayo nga ibaga dagita.
Tuladem ni Pablo
3. Piliem dagiti makaay-ayo a sasao. Kas pagarigan, no kasarsaritam ti maysa a saan a Kristiano ti relihionna, mabalinmo nga i-adjust ti panangiserrekmo iti Biblia wenno no kasanom a tukoyen ni Jesus.
4. Saanmo koma a dagus nga ilinteg ti kaskasabaam. Bay-am nga iyebkasna ti rikriknana. No adda ibagana a maikontra iti pannursuro ti Biblia, liklikam ti tendensia a makiriri. (Sant. 1:19) No dumngegka kenkuana, maawatam no apay a kasta ti patpatienna.—Prov. 20:5.
5. Anamongam ken komendaram ti aniaman nga umiso nga imbaga ti kaskasabaam. Mabalin a patienna a talaga a husto dagiti isursuro ti relihionna. Mangbirokka pay nga umuna iti punto a pagtunosanyo. Kalpasanna, in-inut nga ilawlawagmo kenkuana no ania ti isursuro ti Biblia tapno maawatanna.