Kinasimple

Ti Inaramid ni Jesus

VIDEO: Ilustrasion ni Jesus Maipapan iti Panangipateg Kadatayo ti Amatayo

1. Buyaem ti VIDEO, wenno basaem ti Mateo 6:​25-27 sa sungbatam dagitoy a saludsod:

1. Kasano nga inladawan ni Jesus ti panangipateg kadatayo ni Jehova?

2. Nupay adu ti ammo ni Jesus maipapan kadagiti billit, ania a simple a detalye ti nagpokusanna? Apay nga epektibo dayta?

Ania ti Masursurotayo ken Jesus?

2. No simple ti panangisurotayo, nalaklaka a matandaanan dagiti tattao ti naisuro kadakuada ken madanon ti pusoda.

Tuladem ni Jesus

3. Saan koma a sika ti makaadu nga agsao. Imbes nga estoriaem ti amin nga ammom maipapan iti maysa a topiko, agpokuska iti topiko nga ad-adalenyo. Kalpasan a makapagsaludsodka, anusam nga urayen a sumungbat ti iyad-adalam. No saanna nga ammo ti sungbat wenno adda ibagana a maikontra kadagiti pannursuro ti Biblia, agusarka kadagiti kanayonan a saludsod tapno maalana ti punto. No naawatannan ti kangrunaan a punto, umakarkayon.

4. Tulongam ti iyad-adalam a mangkita iti koneksion dagiti baro a masursurona iti datin nga ammona. Kas pagarigan, sakbay nga adalenyo ti leksion maipapan iti panagungar, repasuenyo iti apagbiit ti ammon ti iyad-adalam maipapan iti kasasaad dagiti natay.

5. Agusarka kadagiti epektibo nga ilustrasion. Sakbay nga agusarka iti ilustrasion, isaludsodmo iti bagim:

1. ‘Simple kadi ti ilustrasion?’

2. ‘Nalaka ngata a maawatan ti iyad-adalak?’

3. ‘Matulonganna ngata ti iyad-adalak a manglagip iti kangrunaan a punto—saan laeng a ti ilustrasion?’