ABISAI

[mabalin nga, (Adda) ni Ama].

Ti anak ti kabsat a babai ni David wenno ti kabsatna iti ina (wenno ama) a ni Zeruia ken kabsat da Joab ken Asael.​—2Sm 2:18; 1Cr 2:15, 16.

Gapu iti kinamaingel ni Abisai mabigbigbig nga ad-adda ngem kadagiti 30 a nabibileg a mannakigubat nga indauluanna kas panguluen, ti pakasarsaritaanna ket pumadpada iti pakasarsaritaan dagiti tallo a kabibilgan a lallaki ni David, ta iti naminsan maymaysana a nangkabil iti 300 kadagiti kabusor, ngem “iti saad ti umuna a tallo saan a nakagteng.”​—2Sm 23:18, 19.

Sisusungdo a sinuportaran ni Abisai ti amin a kampania militar ni ulitegna a David ngem masansan nga agtignay a sidadarasudos ken awanan asi, iti kasta adda dagiti gundaway a masapul a mapengdan. Kas pagarigan, idi a kaduana ni David simrekda a sililimed iti rabii iti kampo militar ni Saul, no saan nga inggawid ni David nakugsolna koman ti matmaturog a ni Saul, “ti pinulotan ni Jehova,” babaen iti mismo a pika ni Saul. (1Sm 26:6-9) Idi nagrebelde ni Absalom, ni Abisai ket namindua a nagawidan a mangpapatay iti mangilunlunod iti ari a ni Simei. Nupay kasta, ni David saanna a nalapdan ni Abisai a nakitinnulong iti pannakapapatay ni Abner.​—2Sm 3:30; 16:9-11; 19:21-23.

Nalatak ni Abisai gapu iti panangidaulona iti panangkabil kadagiti 18,000 nga Edomita ken iti panangidaulona pay iti pannakidangadang kadagiti Ammonita agingga a nagtatarayda. Nakitinnulong met a namagpatingga iti panagrebelde ni Sheba, ti awan kaes-eskanna a Benjaminita. Iti kaudian a nairekord a pannakigubat ni David, napukaw koman ni David ti biagna iti ima ti maysa a nakataytayag a Filisteo no saan a gapu ken Abisai.​—1Cr 18:12; 19:11-15; 2Sm 20:1, 6; 21:15-17.