ADONI-ZEDEC

[Ni Apo(k) ket Kinalinteg].

Maysa nga ari ti Jerusalem idi tiempo ti panangparmek dagiti Israelita iti Naikari a Daga. Nakikappon ni Adoni-zedec iti dadduma pay a babassit a pagarian iti abagatan ti Jordan tapno agkaykaysada a makigubat iti rumaraut a puersa ni Josue. (Jos 9:1-3) Nupay kasta, nakikappia ken Josue dagiti Heveo nga agnanaed iti Gabaon. Iti panagibales a nairanta a mangpasardeng iti ad-adda pay nga ikakappon iti kabusor, inummong ni Adoni-zedec ti buyotna tapno makikaykaysada kadagiti buyot ti uppat a kanayonan nga ar-ari dagiti Amoreo, ket linakubna ti Gabaon ket ginubatna dayta. Gapu iti nakaskasdaaw a panangispal ni Josue kadagiti Gabaonita ken iti mangduprak a pannakaabak dagitoy nagtitipon a puersa, dagiti lima nga ar-ari nagkamangda idiay Makkeda, ket sadiay nakulongda iti maysa a rukib. Ni Josue a mismo pinapatayna ni Adoni-zedec ken ti dadduma pay nga uppat nga ar-ari iti sanguanan dagiti buyotna, ket imbitinna ida kadagiti kayo. Kamaudiananna, naipalladaw a naisubli dagiti bangkayda iti rukib, a nagbalin a tanemda.​—Jos 10:1-27.