AGAGEO

[Ken (Kukua ni) Agag].

Termino a nayawag ken Haman ken iti amana a ni Hamedata, iti Ester 3:1, 10; 8:3, 5; 9:24. Nalawag nga ipakita dayta a termino a kapkaputotan ida ni Agag ket ngarud Amalekita ti nagtaudanda. Kastoy ti kadawyan a panangtarus dagiti Judio iti dayta a sao ket patienda a ni Agag ti monarka a nadakamat iti 1 Samuel 15:8-33. Ni Josephus tinukoyna a ni Haman ket “Amalekita ti nagtaudanna.” (Jewish Antiquities, XI, 209 [vi, 5]) Ni Mardokeo ket kaputotan ni Kis iti tribu ni Benjamin, kaipapanan dayta a siguden nga agkabusorda ken Haman.​—Est 2:5.