AHIAS

[Kabsat(ko) ni Jehova].

1. Ti maikalima a nainaganan nga anak ni Jerameel, kameng ti tribu ni Juda.​—1Cr 2:25.

2. Maysa a pannakaulo ti pamilia iti tribu ni Benjamin. (1Cr 8:6, 7) Pagarupen ti dadduma nga isu met laeng ni Ahoa iti bersikulo 4.

3. Anak ni Ahitub ken apoko ni Eli iti tumeng. Nagserbi kas nangato a padi idiay Silo idi ni Saul ti ari. (1Sm 14:3, 18) Isingasing ti dadduma a mabalin nga isu ket kabsat ni Ahimelec wenno, isu ni Ahimelec no ti “as” iti naganna ket masuktan iti “melec.”​—1Sm 22:9.

4. Maysa kadagiti nabileg a lallaki iti buyot ni David, maysa a Pelonita.​—1Cr 11:36.

5. Maysa a Levita a nadutokan nga agaywan kadagiti gameng ti balay ni Jehova idi panagturay ni David.​—1Cr 26:20.

6. Anak ni Sisa. Isu ken ti kabsatna a ni Elioref ket naprinsipean a sekretario ni Solomon.​—1Ar 4:2, 3.

7. Maysa a mammadto ni Jehova ken agnanaed idiay Silo. Impadtona no kasano a mabingay ti pagarian ni Solomon. Idi pinisangna ti maysa a baro a kawes iti 12 a kapaset, ni Ahias intedna ken Jeroboam ti 10 a kapaset, nga inkarina a no agbalin a matalek ni Jeroboam, ibangonan ni Jehova iti “agpaut a balay.” (1Ar 11:29-39; 12:15; 2Cr 10:15) Kalpasan ti adu a tawen a nadangkes a panagturay, imbaon ni Jeroboam ti asawana tapno agimtuod ken Ahias maipapan iti kasasaad ti masakit nga anakna. Ti mammadto, nga itan lakayen ken bulsek, impadtona a di agbayag matayen ti ubing ket ni Jehova ‘mangaramid iti naan-anay a panangsagad iti likudan ti balay ni Jeroboam, kas iti panangikkat ti maysa iti ibleng.’ (1Ar 14:2-18; 15:29) ‘Ti padto ni Ahias,’ maysa kadagiti naisurat a rekord a pakairamanan dagiti pasamak ni Solomon, nagtalinaed agingga iti tiempo a pananggupgop ni Esdras kadagiti Cronicas.​—2Cr 9:29.

8. Ama ni Baasa, a nakikumplot maibusor ken Nadab ken namagbalin iti bagina nga ari ti Israel; kameng ti tribu ni Isacar.​—1Ar 15:27, 33; 2Ar 9:9.

9. Maysa kadagiti 44 a pannakaulo dagiti umili a ti kaputotanna, no saan nga isu a mismo, nakiraman iti panangselio iti “mapagpiaran nga urnos” ni Nehemias a pannagna kadagiti linteg ni Jehova.​—Ne 10:26; 9:38.