AHITOFEL

Maysa a Gilonita iti katurturodan ti Juda (2Sm 15:12), ama ti maysa kadagiti nabibileg a lallaki ni David nga agnagan Eliam, ken mabalin nga apong ni Bat-seba. (2Sm 11:3; 23:34) Kas personal a manangbalakad ni David, ti nainsiriban a pammatigmaan ni Ahitofel ket naibilang a kasla sao a mismo ni Jehova. (2Sm 16:23) Idi agangay, daytoy sigud a nadekket a kadua sigugulib a nagbalin a traidor ket kimmappon iti anak ni David a ni Absalom iti panangpaksiat iti ari. Kas nangidaulo iti panagrebelde, indagadagna ken Absalom a makidenna kadagiti kamalala ni David, ken dimmawat iti pammalubos a mangbuangay iti buyot a buklen ti 12,000 ket dagus a sapulenna ken papatayenna ni David bayat a marirriribukan ken nakapsut ni David. (2Sm 15:31; 16:15, 21; 17:1-4) Idi pinaay ni Jehova daytoy nadursok a gandat, ket nasurot ti pammatigmaan ni Husai, nalawag a nabigbig ni Ahitofel a mapaayto ti iyaalsa ni Absalom. (2Sm 15:32-34; 17:5-14) Nagpakamatay ket naitabon a naikadua kadagiti inapona. (2Sm 17:23) Daytoy laeng ti panagpakamatay a nadakamat iti Hebreo a Kasuratan, malaksid kadagiti napasamak iti tiempo ti gubat. Ti tinatraidor a tignayna ket nabatad a nadakamat iti Salmo 55:12-14.