AJALON

[Disso ti Kabaian nga Ugsa; Disso ti Kalakian nga Ugsa].

1. Maysa a siudad iti Sefela wenno naturod a nababa a lugar iti Palestina, adda iti maysa a turod iti makin-abagatan nga ungto ti napintas a nababa a tanap, wenno ginget, ti Ajalon. Ti purok iti daytoy a disso ket maawagan itan iti Yalo ken adda iti amianan laeng ti dalan manipud Jerusalem nga agturong iti Tel Aviv-Yafo, agarup 21 km (13 mi) iti laud nga amianan-a-laud ti Jerusalem.

Kadagiti ginget a lumasat iti turturod ti Sefela, adda ti Ginget ti Ajalon iti kaamiananan a paset ket maysa a napateg a bessang manipud tantanap iti igid ti baybay nga agturong iti makintengnga a nakabambantay a rehion. Nabatad nga adda ni Josue iti asideg daytoy a tanap idi kiniddawna nga agintek “a di agkutkuti” ti init ken bulan iti ngato ti Gabaon ken iti ngatuen ti “nababa a tanap ti Ajalon,” bayat nga ilepleppasna ti naballigi a pannakirupakna iti lima nga Amoreo nga ar-ari a nakigubat iti Gabaon. (Jos 10:12-14) Kalpasan ti panangparmek ni Josue iti Canaan, naituding ti Ajalon iti tribu ni Dan. (Jos 19:40-42) Idi agangay naituding dayta iti annak ni Cohat kas siudad dagiti Levita.​—Jos 21:24.

Idi damo, dagiti Danita saanda a nabaelan a paksiaten dagiti Amoreo manipud Ajalon, ngem agparang a timmulong ti Efraim manipud amianan ket “ti ima ti balay ni Jose dimmagsen unay iti kasta napilitda [dagiti Amoreo] nga agtrabaho iti narigat.” (Uk 1:34, 35) Mabalin a daytoy ti rason a ti 1 Cronicas 6:69 ilanadna ti Ajalon kas kukua ti Efraim ken kas intedda kadagiti Cohatita. (Nupay kasta, kitaenyo ti pumadpada a kaso ti GAT-RIMMON Num. 1.) Idi agangay, nalabit kalpasan ti pannakabingay ti pagarian, nadakamat dayta kas siudad ti sumagmamano a natan-ok a Benjamita.​—1Cr 8:13.

Idiay Ajalon ti damo a nagballigian ni Saul maibusor kadagiti Filisteo, idi a ti Israel ‘intultuloyna a kinabil dagiti agtaltalaw a Filisteo manipud Micmas agingga iti Ajalon.’ (1Sm 14:31) Adu a tawen kalpasan dayta, idi nabingayen ti pagarian kalpasan ti ipapatay ni Ari Solomon (a. 998 K.K.P.), ti anak ken sunona a ni Rehoboam sinarikedkedanna ti Ajalon ket pinagbalinna a maysa kadagiti salindegna iti amianan ken laud. (2Cr 11:5-12) Gistay dua ket kagudua a siglo kalpasanna, ti Ajalon innala dagiti Filisteo bayat ti panagturay ti di matalek nga Ari Acaz (761-746 K.K.P.).​—2Cr 28:18.

Nadakamat ti Ajalon kas Aialuna iti maysa kadagiti Amarna a Taptapi.

2. Maysa a lugar iti teritoria ti Zabulon, a nakaitabonan ni Ukom Elon iti dayta a tribu. (Uk 12:12) Saan a masigurado ti ayanna.