ALGUM

[Heb., ʼal·gum·mimʹ (2Cr 2:8; 9:10, 11); ʼal·mug·gimʹ (1Ar 10:11, 12)].

Kayo nga inraman ni Solomon iti panagkiddawna ken Hiram ti Tiro kadagiti kayo a maipaay ti panangibangon iti templo ken manipud iti dayta naaramid dagiti agdan ken sadiri kasta met dagiti arpa ken pagtokar nga adda kuerdasna.

Saan a masigurado ti pakabigbigan ti kayo nga algum itoy a salaysay. Sigun iti tradision naisingasing nga isu dayta ti nalabaga a sandalwood (Pterocarpus santalinus) a masarakan itan idiay India ken Sri Lanka, nupay ti sumagmamano anamonganda ti puraw a sandalwood (Santalum album), nalabit gapu iti sasao ni Josephus a pumuraw ti maris dayta. (Jewish Antiquities, VIII, 177 [vii, 1]) Ti nalabaga a sandalwood dumakkel kadagiti katayag nga agarup 7.5 agingga iti 9 m (25 agingga iti 30 pie) ken addaan iti natangken, nagbinggas iti pino, lumabaga a kayumanggi a kayo a nasileng iti kasta unay. Naisingasing kas mayanatup a maipaay iti kita dagiti pagtokar iti musika a nadakamat iti salaysay ti Biblia. Ti kayo addaan iti nabanglo nga ayamuom ken nakaan-andur kadagiti insekto.

Ti nalabaga a sandalwood saan nga agtubo idiay Libano iti agdama a tiempo. Nupay kasta, saan a sigurado ti rekord no dagiti kayo nga “algum” ket nainkasigudan a nagtubtubo idiay Libano wenno saan. Uray no kasta, idi agangay nakita ni Hiram a maitutop nga iyeg dagita manipud Ofir, ket ditoy manen, mabalin a ti kaykayo maang-angkat uray pay idiay Ofir, ta adda iti kasasaad nga agserbi kas sentro a paglakuan a makigingginnatang iti India, Egipto, ken dadduma pay a lugar iti Africa. (1Ar 10:11, 22) Ti kinatakkon ken kinapateg ti kayo nga impatulod ni Hiram ket impatuldo ti sasao a “ti kaykayo dagiti algum a kas itoy saan pay a dimteng wenno nakita ida agingga itoy nga aldaw.”​—1Ar 10:12.