ANA

[manipud Heb., kaipapananna ti “Pabor; Parabur”].

Mammadto a babai, anak ni Fanuel iti tribu ni Aser.

Nabalo ni Ana kalpasan ti pito laeng a tawen a kaadda ti asawana, ken agtawen iti 84 idi a ti ubing a ni Jesus naidatag idiay templo. Nupay kasta, isu ket naynay a nagserserbi idiay templo, nabatad a manipud iti panagserbi iti bigat agingga iti panagserbi iti rabii, ket gapu iti dayta naaddaan iti pribilehio a makakita iti ubing a ni Jesus ken mangsaksi maipapan kenkuana. ‘Dagiti panagayunar ken ar-ararawna’ ipasimudaagda ti panagleddaangna ken napasnek a panagtarigagayna. Mabalin a gapu daytoy iti sinigsiglon a pannakasakup dagiti Judio, a nabuyogan kadagiti dumakdakes a kasasaad ti relihion a dimmanon pay ketdi iti templo ken ti papadi dayta. Uray pay kasta, nupay nalabit saanna a ninamnama a sibibiag pay inton dakkelen ti ubing, sirarag-on a mangipapaay iti panangsaksi iti sabsabali maipapan iti pannakawayawaya a naikeddeng nga aramidento daytoy um-umay a Mesias.​—Lu 2:36-38.