ASRIEL

Lalaki a kaputotan ni Manases a nagbalin nga ulo ti pamilia dagiti Asrielita. Ipasimudaag ti Numeros 26:29-31 nga isu ti apoko ni Manases iti tumeng babaen ken Maquir ken iti anakna a ni Galaad. Sigun iti 1 Cronicas 7:14, ni Asriel ket anak ni Manases nga impasngay kenkuana ti kamalalana a taga Siria. Nupay kasta, kastoy ti mabasa a paset ti sasao a naikkan ti parentesis: “[Ti kamalala] impasngayna ni Maquir nga ama ni Galaad.” Ngarud, maitunos iti gagangayen a maar-aramid iti listaan dagiti kapuonan iti Biblia, ni Asriel ket mabalin nga awagan ditoy iti “anak” ni Manases, a kayatna a sawen maysa laeng kadagiti naud-udi a kaputotanna (babaen ken Maquir, anak ni Manases babaen iti kamalalana a taga Siria). Ngem posible nga adda anak a mismo ni Manases ken adda met apokona iti tumeng nga agpada ti naganda. Ti “annak ni Asriel” ket karaman kadagiti kaputotan ni Manases nga inikkan ni Josue kadagiti bingayda a teritoria idiay Naikari a Daga.​—Jos 17:1-4.