BAAL-ZEBUB

[Makinkukua Kadagiti Ngilaw].

Ti Baal a nagdaydayawan dagiti Filisteo idiay Ekron. Adda dagiti mangipasimudaag a gagangay a kaugalian idi dagiti Hebreo a balbaliwan ti nagnagan ti ulbod a didios iti umas-asping a nagan ngem manglais. Gapuna, ti “zebub” nga adda iti ngudo ket mabalin a panangbalbaliw ti maysa kadagiti titulo ni Baal nga agparang kadagiti teksto ti Ras Shamra kas “Zabul” (“Prinsipe”), wenno Zebul. Nupay kasta, kunaen ti dadduma nga eskolar a ti nagan dayta a dios ket inted dagiti managdaydayawna gapu ta imbilangda nga isu ti nangpataud kadagiti ngilaw ket ngarud kabaelanna nga iturayan daytoy a gagangay a mangdadael nga insekto iti Makintengnga a Daya. Yantangay ti panangipaay kadagiti pammadles ket nainaig ken Baal-zebub, anamongan ti dadduma ti panangmatmat a ni Baal-zebub ket dios a nabigbig a mangipapaay kadagiti pammadles babaen iti panagtayab wenno panagsayengseng ti ngilaw.​—2Ar 1:2.

Ni Ocozias nga ari ti Israel ket nangibaon kadagiti mensahero tapno imtuodenda ken Baal-zebub no makaungar pay iti nakaro a pannakadangranna wenno saanen. Babaen ken mammadtona nga Elias, ni Jehova binabalawna ni Ocozias, a kunkunana: “Gapu kadi ta awan a pulos Dios iti Israel nga agbaonka tapno agimtuodka ken Baal-zebub a dios ti Ekron? Gapuna, no maipapan iti sopa a sinagpatam, saankanto a bumaba manipud iti dayta, agsipud ta mataykanto a di bumurong.”​—2Ar 1:2-8; kitaenyo ti BEELZEBUB.