BAASA

Maikatlo nga ari ti sangapulo-tribu a pagarian ti Israel; anak ni Ahias iti tribu ni Isacar ken nanumo ti nagtaudanna. Inagawna ti trono babaen ti panangpapatayna iti sinukatanna a ni Nadab, a kalpasan dayta kinabilna ti intero a balay ni Jeroboam, kas naipadto. (1Ar 15:27-30; 14:10) Nupay kasta, intultuloy ni Baasa ti impasdek ni Jeroboam a panagdaydayaw iti kigaw a baka, ket gapu iti daytoy naikari met a matalipupos ti mismo a balayna. (1Ar 16:1-4) Idi nakigubat iti Juda, inuyotan ni Asa ti ari ti Siria tapno riribukenna ni Baasa manipud iti amianan. Idin rinebbek ni Asa ti nasarikedkedan a siudad ti Rama, nga ibangbangon idi ni Baasa. (1Ar 15:16-22; 2Cr 16:1-6; kitaenyo ti ASA Num. 1 [Kinagulib Maibusor ken Baasa, Pannakigubat Kenkuana].) Kalpasan ti panagturayna manipud agarup 975 agingga iti 953 K.K.P., natay ni Baasa ket naitabon iti kabeserana, ti Tirza. Ti anakna a ni Elah ket nagbalin nga ari idi maika-26 a tawen ni Asa nga ari ti Juda (1Ar 16:8), ngem idi maika-27 a tawen ni Asa (1Ar 16:15), nagrebelde ni Zimri ket inkisapna ti balay ni Baasa, nga intungpalna ti bilin ni Jehova.