BAHURIM

[Napili].

Purok iti abay ti Bantay dagiti Olibo, adda iti makin-amianan a deppaar ti maysa a kadaanan a dalan nga agturong iti Jerico ken iti Jordan. Kadawyan a maikunkuna nga isu ti Ras et-Tmim, 2 km (a. 1 mi) iti amianan a daya ti disso a nagsaadan ti templo.

Idi maisublin ni Mical (anak a babai ni Saul) iti ikut ni Ari David, nagsangsangit ni Paltiel agingga idiay Bahurim bayat a magmagna a sumarsaruno ken Mical. Ti bilin ni Heneral Abner nga “Inka, agsublika!” imdasen a namagsubli kenkuana manipud iti dayta a disso. (2Sm 3:16) Kalpasanna, idi panawan ni David ti Jerusalem gapu iti kumplot ti anakna a ni Absalom, binallasiwna ti naapres a ginget ti Kidron, simmang-at “iti sasang-atan dagiti Olibo,” linabsanna ti tapaw, ket dimteng iti Bahurim. (2Sm 15:23, 30; 16:1, 5) Ditoy a nagna ni Simei (Benjamita a kabagian ni Saul) iti igid ti bakras ti bantay, nga inlunlunodna ni David, nagibarbarsak iti batbato, ken nagipurpuruak iti tapok. (2Sm 16:5-13; 19:15-23) Idiay met Bahurim ti lugar a naglemmengan da Ahimaaz ken Jonatan (annak da Sadok ken Abiatar) iti bubon ti maysa a tao iti dalanda a mapan mangidanon iti maysa a mensahe ken Ari David.​—2Sm 15:27; 17:17-20.