BARUC

[Nabendisionan].

1. Ti eskriba a sekretario ni Jeremias. Ni Baruc ket anak ni Nerias ken kabsat ni Seraias, agay-aywan kadagiti kuartel ni Zedekias a nangbasa iti lukot ni Jeremias iti igid ti Eufrates.​—Jer 32:12; 51:59-64.

Idi maikapat a tawen ni Ari Jehoiaquim, 625 K.K.P., rinugian ni Baruc nga isurat iti maysa a lukot ti naimpadtuan a mensahe ti pannakaukom ti Jerusalem, nga indiktar ni Jeremias. Idi naladaw a paset ti otonio ti simmaganad a tawen, 624 K.K.P., sipipigsa a binasa ni Baruc ti lukot “kadagiti lapayag dagiti amin nga umili” iti pagserkan ti balay ni Jehova. Kalpasanna, napaayaban tapno basaenna dayta iti ummong dagiti prinsipe a nangidagadag kada Baruc ken Jeremias nga aglemmengda gapu ta natignay dagitoy iti nangngeganda ken nagbutengda kadagiti ibungana no dumanon ti sao kadagiti pagdengngeg ti ari. Idi nangngeg ni Jehoiaquim ti naibasa a pannakakondenar, pinirsapirsayna a pinuoran ti lukot ken imbilinna a maisaklang kenkuana da Baruc ken Jeremias, “ngem ni Jehova pinagtalinaedna ida a silelemmeng.” Idin nangisurat manen ni Baruc iti sabali pay a lukot a kas iti immuna babaen ti panangidiktar ni Jeremias, ngem naglaon dayta iti “ad-adu pay a sasao” manipud iti ngiwat ni Jehova.​—Jer 36:1-32.

Sangapulo ket innem a tawen kalpasanna, idi maikasangapulo a tawen ni Zedekias, bulbulan laeng sakbay ti pannakarbek ti Jerusalem, innala ni Baruc dagiti kasuratan ti sanikua a ginatang ni Jeremias iti kasinsinna ket inkabilna ida iti maysa a basehas a damili tapno mataginayon ken maidulin.​—Jer 32:1, 9-16.

Adda gundaway a bayat ti panangisurat ni Baruc iti umuna a lukot, nga isu nagreklamo gapu iti pannakapakilna ket pinakdaaran ni Jehova: ‘Dika itultuloy ti agsapul iti naindaklan a bambanag.’ Nupay kasta, gapu iti kinamatalekna naikari kenkuana a maitalimeng ken masalakniban ‘kadagiti amin a disso a papananna,’ saan laeng a bayat ti nakaam-ames a pannakalakub ti Jerusalem no di ket uray pay kalpasanna, idi nga isuda ken Jeremias ket pinilit dagiti rebelioso nga umili a makipagsalogda kadakuada idiay Egipto.​—Jer 45:1-5; 43:4-7.

2. Anak ni Zabbai; “nagtrabaho [ni Baruc] a buyogen ti regget” a timmulong ken Nehemias a mangbangon manen kadagiti pader ti Jerusalem. (Ne 3:20) Mabalin nga isu met laeng ti Num. 3.

3. Maysa a padi a ti kaputotanna, no saan nga isu a mismo, ti nangpatalged iti “mapagpiaran nga urnos” ni Nehemias. (Ne 9:38; 10:1, 6, 8) No ni Baruc a mismo ti nangselio iti daytoy a tulagan, mabalin nga isu met laeng ti Num. 2.

4. Ama wenno inapo ni Maasias, a nagnaed idiay Jerusalem idi tiempo ni Nehemias. Kaputotan ni Juda.​—Ne 11:4-6.