BATBATEK

Babassit nga arkos nga adda lussokna, naaramid kadagiti material a kas iti sarming, saniata, balitok, ken pirak. Gagangay a mayukkor dagita kas kuentas ken nasarakan kadagiti napreserba a bangkay dagiti Egipcio, kadagiti tanem dagiti Griego ken Romano, ken iti rebrebba dagiti templo ti Asiria, kasta met iti Megiddo, Asdod, ken Bet-semes.

Maipapan iti naslag a Sulamita a babai iti Kanta ni Solomon, naikuna: “Dagiti pingpingmo nagimnasda kadagiti sinallapid a buok, ti tengngedmo iti maysa nga ukkor a batbatek.” (Sol 1:10) Ngarud, nalawag a dagiti ukkor a batbatek karamanda kadagiti aruaten a pagarkos nga inaramat dagiti Hebreo a babbai kadagidi kadaanan a tiempo.​—Kitaenyo ti ARKOS.