BEER

[Bubon].

Ti Hebreo a sao a beʼerʹ ket kadawyan a tumukoy iti maysa a bubon a maisupadi iti maysa a nainkasigudan nga ubbog (Heb., ʽaʹyin). Gagangay nga agparang dayta iti nagtipon a nagnagan dagiti lugar.​—Idiligyo ti BEER-ELIM; BEER-SEBA.

1. Kalpasan ti ilalabas dagiti Israelita iti Arnon idi agturongda iti Naikari a Daga, nakagtengda iti Beer. (Nu 21:13-16) Nakali ditoy ti maysa a bubon, nalawag nga inaramid dayta dagiti prinsipe a pannakaulo dagiti tribu, nga inaramatda ti bukodda a sarukod, ket nagburayok ti danum. Gapu iti daytoy a pasamak, naputar ti nadaniw a kanta a naiparang iti bersikulo 17, 18.

Maigapu iti paset dagiti prinsipe iti pannakakali ti bubon, isingasing ti sumagmamano nga isu met laeng daytoy a disso ti Beer-elim (kaipapananna ti “Bubon ti Dadakkel a Kayo”). (Isa 15:8) Saan a masigurado ti ayanna, ngem naikuna nga adda iti naapres a ginget a naawagan Wadi Thamad, iti amianan ti Arnon ken agarup 56 km (35 mi) iti daya ti Natay a Baybay. Masansan a nakalaklaka ti makasarak iti danum ditoy babaen ti panangkutkot iti daga.

2. Maysa a disso a nagkamangan ni Jotam, anak ni Gideon (Jerubaal), kalpasan ti panangibutaktakna iti kinagulib ni Abimelec. (Uk 9:3-5, 21) Adda dagiti mangibaga a ti posible nga ayan ti Al-Bira ket agarup 12 km (7.5 mi) iti amianan ti Bet-san ken abagatan a daya ti Bantay Tabor; ti dadduma kunaenda nga isu dayta ti Beerot. (Kitaenyo ti BEEROT.) Nupay kasta, gapu ta awan ti aniaman a mangipasimudaag iti direksion ti panagtalaw ni Jotam manipud Bantay Gerizim, saan a masigurado ti ayanna.