BEREA

Maysa a siudad nga aduan iti umili, sakup ti probinsia ti Macedonia a sinarungkaran ni apostol Pablo bayat ti maikadua a panagbaniagana kas misionero. (Ara 17:10-14) Maawagan ita iti Veroia ken masarakan iti nadam-eg a lugar iti arisadsad ti Bantay Bermios nga agarup 65 km (40 mi) iti laud nga abagatan-a-laud ti Tesalonica. Nagsaad ngarud iti agarup 35 km (22 mi) manipud Baybay Aegeano.

Nalabit idi agarup 50 K.P. a simmangpet da Pablo ken Silas idiay Berea kalpasan a napilitanda a pumanaw iti rabii manipud Tesalonica gapu iti naranggas a panagderraaw. Adda maysa a komunidad ken sinagoga dagiti Judio idiay Berea a nangaskasabaan dagitoy dua a misionero. Gapu ta situtulok a dimngeg dagiti taga Berea iti Nakristianuan a mensahe ken gapu ta siaanep a sinukimatda ti Kasuratan tapno birokenda ti pammatalged kadagiti banag a naammuanda, nakomendaranda iti Aramid 17:11. Adu ti nakomberte manipud kadagitoy a ‘natakneng ti panagpampanunotna’ a tattao, Judio ken Griego. Nupay kasta, nasinga ti trabaho ni Pablo gapu iti isasangpet dagiti panatiko a Judio manipud Tesalonica a determinado a mangpataud iti kanayonan a panagderraaw. Isu naglayag nga agturong idiay Atenas, nga imbatina da Silas ken Timoteo tapno aywananda ti baro a bunggoy dagiti manamati idiay Berea.​—Ara 17:12-15.

Awan duadua a limmasat ni Pablo iti mismo a Berea wenno iti asideg dayta bayat ti maikatlo a panagbaniagana kas misionero, iti kasta nakapan manen idiay Macedonia. Ti maysa kadagiti kakaduana iti daydi a tiempo isu ni Sopatro, maysa a Kristiano manipud Berea.​—Ara 20:1-4.