BILDAD

Maysa kadagiti tallo a kakadua ni Job, a naawagan iti Suhita; kaputotan ni Suah, ti anak a lalaki ni Abraham babaen ken Ketura. (Job 2:11; Ge 25:2; 1Cr 1:32) Iti panagsaona kas maikadua nga agbitla iti tallo a rikus ti debate, kadawyan a pasarunsonan ni Bildad ti gagangay a tema a rinugian ni Elifaz; ab-ababa ken natadtadem dagiti panagsaona, nupay saan a kas iti kakaro ti panagsao ni Zofar. Ni Bildad ti umuna a nangakusar iti annak ni Job iti dakes nga aramid isu a maikarida iti didigra a dimteng kadakuada. Kamali ti pampanunotenna a nangusar iti daytoy a pangngarig: Kas ti pannakagango ken pannakatay dagiti papiro ken runo iti kaawan ti danum, kasta met “dagidiay amin a mangliplipat iti Dios”​—pudno met dayta a sasao, ngem dakkel a biddut ti panangiparipirip nga agaplikar dayta iti managbuteng-Dios a ni Job. (Job 8) Kas ken Elifaz, di umiso nga impada ni Bildad dagiti rigat ni Job kas kadagidiay dumteng iti nadangkes: “awananto iti putot ken awanan iti annak” ti piman a ni Job, dayta ti imparipirip ni Bildad. (Job 18) Ti “makaliwliwa” a sasao manipud iti tallo a kakadua ni Job ket nagpatingga iti maikatlo nga ababa a panagsao ni Bildad, a nangirasonanna a ti tao ket “maysa a sur-it” ken “maysa nga igges” isu a narugit iti sanguanan ti Dios. (Job 25) Kamaudiananna, ti Dios binilinna ni Bildad agraman ti dua a kakaduana nga agidatonda iti mapuoran a sakripisio ken kiddawenda ken Job nga ikararaganna ida.​—Job 42:7-9.