BILEAM

[mabalin a, Maysa a Mangal-alun-on].

Ili a naituding kadagiti Levita iti pamilia ni Cohat, a naited kadakuada manipud teritoria ti kagudua a tribu ni Manases a masarakan iti laud ti Karayan Jordan. (1Cr 6:70; LXX, “Ieblaam”) Ti listaan dagiti siudad dagiti Levita iti Josue 21:11-39 ket saanna nga iraman ti Bileam, ngem patien ti adu nga eskolar a biddut ti eskriba ti pannakaulit ti Gat-rimmon iti bersikulo 25 a Bileam koma ti nailanad. Agparang a ti Bileam ket sabali pay nga ispeling ti Ibleam, nga ad-adda a naar-aramat ti Ibleam.