Geograpiko a Paspaset ti Naikari a Daga

TI DAGA nga inted ti Dios iti kadaanan nga Israel saklawenna ti naisangsangayan a nagduduma a geograpiko a paspaset. Iti amianan, masarakan ti bambantay a nabungon iti niebe; ket napudpudot ti klima iti luglugar iti abagatan. Iti las-ud dagiti masakupanna, adda dagiti nadam-eg a tantanap ken katurturodan nga agpaay kadagiti minuyongan ken pagpaaraban kadagiti arban, kasta met dagiti langalang a let-ang. Iti daytoy bassit laeng a disso, makita ti ladawan ti nadumaduma a geograpiko a paspaset ti daga.

Ti igid ti makindaya a pagpatinggaan ti Baybay Mediteraneo ket atiddog ken akikid a nadam-eg a tanap. Iti daya dayta isu ti Sefela, naturod a tantanap a sadiay naruay dagiti kaubasan ken kaolibuan. Iti dayaenna, adda kabambantayan a kasla maysa a dakkel a duri iti tengnga daytoy a daga. Kalpasanna, ti daga giddato nga agsalog iti Yuyeng a Ginget, a paatiddog ti pananggisayna iti daga. Iti daytoy a ginget, agsikkosikko nga agayus ti Karayan Jordan manipud Baybay ti Galilea agingga iti Asin a Baybay. Iti daya ti Jordan, adda nadam-eg a turturod ken pagpaaraban. Iti makindaya a labes daytoy makaatrakar a daga, mangrugi ti Desierto ti Arabia.

Iti alimpatok ti kinarang-ayna, ti Naikari a Daga agraman ti isuamin a nadumaduma a pasetna ket kasla daydi minuyongan ti Eden. Gapuna, agserbi ti Israel kas pangripiripan no anianto ti kasasaad ti Paraiso maipaay iti sangatauan iti amin a paset ti daga iti sidong ti Pagarian ti Dios.