CARIANO A PARA-GUARDIA

Maysa a grupo ti buyot a timmulong ken Jehoiada iti pannakapaksiat ni Athalia ken iti pannakaisaad ni Jehoas kas ari ti Juda.​—2Ar 11:4, 13-16, 19.

Ibilang ti adu nga eskolar a ti Cariano a para-guardia ket sabali pay a nagan maipaay kadagiti Kereteo, a nadakamat kas agserserbi kadagiti puersa militar da David ken Solomon. Iti panangmatmat ti sumagmamano nga eskolar, nagserbi met dagiti Kereteo kas naisangsangayan a para-guardia maipaay kadagitoy nga ar-ari. (2Sm 8:18; 1Ar 1:38; 1Cr 18:17) Daytoy a panamagnaig iti Cariano a para-guardia ken kadagiti Kereteo naibatay met iti kinapudno a ti Masoretiko a teksto dakamatenna ti “Cariano a para-guardia” iti 2 Samuel 20:23, bayat a “dagiti Kereteo” ti mabasa iti marhin dayta, kasta met iti adu a Hebreo a manuskrito.

Adda maysa a kadaanan a distrito ti Caria iti makin-abagatan a laud a paset ti Asia Menor. Agsipud ta ti Ezequiel 25:16 ken Sofonias 2:5 inaigda dagiti Kereteo kadagiti Filisteo, ken agsipud ta ti patarus dagitoy a teksto iti Griego a Septuagint ket “dagiti Cretano” imbes a dagiti Kereteo, patien ti sumagmamano a nalabit dagidiay kameng ti Cariano a para-guardia sigud a naggapuda iti distrito ti Caria a dimmalanda iti Creta.