PULI

Dakkel a grupo ti kagimongan nga addaan iti sapasap a tawid, ken umarngi iti maysa a tribu ti kadakkelna.

Iti amin a tallo a gundaway a panagparang ti Hebreo a sao nga ʼum·mahʹ, tumukoy dayta iti dakkel a grupo dagiti di Israelita ken naipatarus kas “puli.” Dagiti kaputotan ti 12 nga annak ni Ismael, kas pagarigan, ket nadeskribir kas ‘dagiti puli’ iti nasapa a paset ti pakasaritaan dayta nga etniko a grupo. (Ge 25:16) Pudno met dayta kadagiti kaputotan ni Midian. (Nu 25:15) Ti termino masarakan met iti Hebreo a daniw iti Salmo 117:1, a pagparanganna a kapadpada ti “nasion.”

Ti Hebreo a sao a sheʹvet, a gagangay a maipatpatarus a “tribu,” ket naipatarus a “puli” iti Numeros 18:2. Nagpaiduma daytoy a gundaway a mangipakita iti panamagduma ti Hebreo a teksto, ta iti daytoy a bersikulo agparang ti dua a sao a mat·tehʹ ken sheʹvet, agpadada a kadawyan a maipatpatarus a “tribu.”