KAWITAN

[Gr., a·leʹktor].

Kalakian a manok. Gapu iti nasaknap a panagtaraken kadagiti manok (Gallus domesticus), gagangay unayen ti makakita iti nasaranta a kawitan. Addaan daytoy iti narangrang-marisna a dutdot, atitiddog a dutdot nga ipus a nagarko iti likudanna, ken nalabaga a tapingar a kasla sagaysay a lasag iti rabaw ti ulona, kasta met nga addaan iti dua nga agkaasping a lambilambi nga agbitbitin iti baba ti sippit ken karabukobna.

Ti kawitan ket saan a nadakamat iti Hebreo a Kasuratan ken agparang laeng iti Kristiano a Griego a Kasuratan mainaig iti panagtaraokna. (Kitaenyo ti PANAGTARAOK TI KAWITAN.) Ti kaaduan a pannakatukoyna ket mainaig iti padto ni Jesus maipapan kadagiti panangilibak kenkuana ni Pedro, a natungpal iti rabii sakbay ti ipapatay ni Jesus ken imbinsabinsa amin dagiti uppat a mannurat dagiti salaysay ti Ebanghelio.​—Mt 26:34, 74, 75; Mr 14:30, 72; Lu 22:34, 60, 61; Jn 13:38; 18:27.

Nupay imparit ti Judio a Mishnah (Bava Kamma 7:7) ti panagtaraken dagiti Judio kadagiti dinguen a kas iti manok, gapu ta amangan no pakaigapuan dagita ti pannakamulitda mainaig iti linteg, ipasimudaag dagiti rabbiniko a gubuayan a nagtaraken kadagita dagiti Judio a kas met dagiti Romano. Nasarakan idiay asideg ti Mizpa ti maysa nga onix a selio nga addaan iti ladawan ti maysa a kawitan ken nakitikitan iti “kukua ni Jaazanias, adipen ti ari.” No, kas kunaen ti sumagmamano, daytoy a Jaazanias (Jezanias) isu daydiay nadakamat iti 2 Ar-ari 25:23 ken Jeremias 40:8, ipasimudaag daytoy nga idi pay laeng maikapito a siglo K.K.P. adda panagtarakenen kadagiti kawitan idiay Israel. Adda met nasarakan a ladawan ti maysa a kawitan iti ribak ti maysa a banga a paglutuan a nakabakab idiay kadaanan a Gabaon.

Agpada a ti upa agraman dagiti piekna, ken ti itlog ket inaramat ni Jesus kadagiti pangngarigna, a mangipakita a ti taraken a manok ket pagaammo unay idi dagiti agdengdengngeg kenkuana.​—Mt 23:37; Lu 11:12; 13:34; kitaenyo ti UPA.