PANAGUR-OR
Bayat ti kaadda ni Pablo idiay Efeso idi agarup 55 K.P., insuratna kadagiti taga Corinto: “Ita no maipapan iti panagur-or a maipaay kadagiti sasanto, kas kadagiti imbilinko kadagiti kongregasion ti Galacia, aramidenyo met ti kasta.” (1Co 16:1, 2) Ti Griego a sao a lo·giʹa (“panagur-or”) ket maus-usaren sipud pay idi maikatlo a siglo K.K.P. Daytoy a sao ket agparang laeng kadagitoy dua a bersikulo ti Biblia.
Ti inaramat ni Pablo a sasao ipamatmatna a nalabit kuarta ti maur-or saan ket a taraon wenno kawes, ket idi inusarna ti sao a “panagur-or,” tuktukoyenna ti naisangsangayan a panagur-or a pagaammo met dagiti taga Corinto. Dagiti pammilin ni Pablo ket mainaig laeng iti wagas a pannakaaramid ti panagur-or. Maaramid dayta iti pribado a pamay-an iti ‘bukod a balay’ ti tunggal maysa, iti boluntario a pamay-an sigun iti ‘kinarang-ay’ ti tunggal maysa, kas iti maar-aramid idi “kadagiti kongregasion ti Galacia.”—1Co 16:1, 2.
Mangmangted idi ni Pablo kadagiti ‘bilin,’ saan nga iti bukodna a pagayatan ken saanna nga impilit dayta, no di ket kas maysa a mangidadaulo ken mangay-aywan iti daytoy nga aramid, a pakainaigan ti sumagmamano a kongregasion. (1Co 16:1) Daytoy a proyekto ket siaannad nga implanona agraman ti dadduma pay a Kristiano. Malaksid pay iti pannakaseknan ni Pablo iti naespirituan a kasapulan dagiti kongregasion, kanayon a sipapanunot iti pisikal a kasapulan dagiti napanglaw a Kristiano, ket nalawag a daytoy a panagur-or kangrunaanna nga agpaay kadagiti Kristiano a taga Judea a marigrigatan iti daydi a tiempo. (Ga 2:10) Iti dadduma pay a teksto, tinukoy ni Pablo daytoy a panagur-or babaen ti sasao a kas iti “kontribusion iti napapanglaw kadagiti sasanto idiay Jerusalem” (Ro 15:26), “ti ministerio a maipaay kadagiti sasanto” (2Co 9:1), “ti nawadwad a sagutyo a naikari idin,” “daytoy publiko a panagserbi” (2Co 9:5, 12), “sagsagut ti asi” (Ara 24:17). Ti kasta a naayat a pannakaseknan iti kasapulan dagiti padada a Kristiano ket maysa kadagiti pakabigbigan dagiti Kristiano idi umuna a siglo.—Jn 13:35; kitaenyo ti KONTRIBUSION.