DOR

Maysa kadagiti siudad ti Palestina a nakialiansa ken Canaanita nga Ari Jabin ti Hasor tapno makirupak ken Josue (Jos 11:1, 2), nupay dagus a naparmek dayta nga aliansa. (Jos 11:12; 12:23) Nupay ti Dor ken dagiti masakupanna nga ili mismo nga addada iti teritoria ti Aser, naited dagitoy iti tribu ni Manases, a saan a nakapaksiat kadagiti agnanaed a nabatbati sadiay. (Jos 17:11-13; 1Cr 7:29) Idi agangay, ti teritoria ti Dor (nga inaywanan ti maysa kadagiti manugang-a-lalaki ni Solomon) nangipaay iti taraon iti sangakabbalayan ti ari maysa a bulan iti makatawen.​—1Ar 4:11.

Ti siudad ti Dor gagangay a maikunkuna nga isu ti Khirbet el-Burj (Tel Dor), 13 km (8 mi) iti amianan ti Cesarea, iti atiddog nga akikid a tanap a naipataraigid iti Baybay Mediteraneo. Gapu ta masarakan dayta iti tanap iti igid ti baybay, napagdedebatean no ania ti kaipapanan ti masansan a maar-aramat a sasao a “kadagiti pantok ti bantay [manipud Heb. a na·phahʹ] ti Dor.” (Jos 11:2) Patien ti sumagmamano nga eskolar a tumukoy daytoy kadagiti rangkis iti kaaduan a paset ti igid ti baybay daytoy a rehion, iti kasta inaigda ti Hebreo a na·phahʹ iti Arabiko a termino a nafnaf, kaipapananna ti “rangkis, teppang.” Patien ti dadduma a tumukoy dayta kadagiti bakras ti turturod a mangrugi 3 km (2 mi) iti daya ti Dor agingga iti tuktok ti Bantay Carmelo.