DUMA

1. Ti maikanem iti listaan dagiti 12 nga annak ni Ismael. Gapu ta ni Mahalat a kabsatna a babai nakiasawa ken Esau a kasinsinna, ni Duma nagbalin a kayong ni Esau. Nagbalin met ni Duma a panguluen ken pannakaulo ti maysa a puli, wenno nasion, kas kaitungpalan ti kari ni Jehova ken Abraham.​—Ge 17:20; 25:14-16; 28:9; 1Cr 1:30.

Ni Duma nga Ismaelita nabatad nga impanaganna ti naganna iti maysa a rehion iti makin-amianan nga Arabia, iti agarup nagtengngaan ti Naikari a Daga ken ti makin-abagatan a Babilonia. Nataginayon ti Duma iti nagan ti maysa a nadam-eg a lugar, ti Dumat al-Ghandal (pagaammo ita kas Al-Jawf). Ti Asirio nga ari a ni Senaquerib dinakamatna ti maysa a lugar nga Adummatu, a “masarakan iti desierto.” Kuna ni Esar-haddon nga adda Adumu a pinarmek ni amana a Senaquerib.

2. Siudad a karaman iti listaan dagiti siudad a naituding iti tribu ni Juda kalpasan a naparmek ni Josue ti daga. (Jos 15:52) Adda dayta iti kabambantayan a rehion ken maikunkuna nga isu ti Khirbet Domeh ed-Deir (Duma), agarup 15 km (9 mi) iti abagatan a laud ti Hebron.

3. Iti Isaias 21:11, naipaay ti pammakdaar maibusor iti “Duma.” Nupay kasta, giddato a nadakamat ti “Seir,” ket mabalin a mangipasimudaag daytoy a ti mensahe naiturong maibusor iti Edom. (Ge 32:3) Ti Griego a Septuagint iti Isaias 21:11 dakamatenna ti “Idumea” (ti daga dagiti Edomita) imbes a “Duma.”