EGLAIM

Nabatad a maysa kadagiti geograpiko nga ungto ti Moab a naikeddeng nga ‘aganug-og’ maigapu iti pannakasamsam dayta a nasion, sigun iti Isaias 15:1, 8. Saan a masigurado ti apag-isu nga ayan ti kadaanan a dissona. Nupay kasta, ti nagan nga Eglaim ken ti umas-asping a nagan nga Agallim, a dinakamat ni Eusebius (Onomasticon, 36, 19-21) nga agarup 12 km (7.5 mi) ti kaadayona iti abagatan ti Rabbath-Moab, ket mabalin a nagtalinaed iti Rujm el-Jilimeh iti dayta a disso wenno iti Khirbet Jeljul, maysa a lugar nga addan idi panawen dagiti Nabataeano ken Romano, nga ad-adayo iti 7 km (4 mi) iti abagatan. Kunaen ni Yohanan Aharoni nga isu met laeng dayta ti Mazraʽ, maysa a nadam-eg a lugar iti amianan a daya ti Peninsula ti Lisan.