ELIASIB

[Ti Diosko Agsubli (Mamagsubli)].

1. Maysa a Levita manipud annak ni Aaron a nakaitumpongan ti maika-11 a benneg ti papadi idi tiempo ni David.​—1Cr 24:1, 5, 6, 12.

2. Ama ti maysa a Jehohanan.​—Esd 10:6.

3. Maysa a Levita a kumakanta iti templo a karaman kadagidiay nangpapanaw iti ganggannaet nga assawada idi tiempo ni Esdras.​—Esd 10:16, 17, 23, 24, 44.

4. Putot ni Zattu a karaman met kadagiti lallaki a namagtalaw iti ganggannaet nga assawada.​—Esd 10:16, 17, 27, 44.

5. Putot ni Bani; karaman met kadagidiay nangpatalaw iti ganggannaet nga assawada.​—Esd 10:16, 17, 34, 36, 44.

6. Apoko ni Jesua, a nakipagsubli ken Zorobabel manipud pannakaidestiero idiay Babilonia. Ni Eliasib ti nangato a padi idi kaaldawan ni Nehemias. Isu ken ti dadduma pay a papadi nakipasetda iti panangibangon manen iti Ruangan ti Karnero ti pader ti Jerusalem. (Ne 12:1, 10; 3:1) Bayat ti kaawan ni Nehemias, tinulawan ni Eliasib ti templo babaen ti panangaramidna iti maysa a siled a panganan iti paraangan ti templo maipaay iti kabagianna nga Ammonita a ni Tobias. Ngem idi nagsubli ni Nehemias, impalladawna ti alikamen ni Tobias iti ruar ket pinadalusanna dagiti siled a panganan. Pinagtalaw met ni Nehemias ti maysa kadagiti annak ni Joiada, anak ni Eliasib, gapu iti panangasawana iti anak a babai ni Sanballat a Horonita.​—Ne 13:4, 5, 7-9, 28.

7. Anak ni Elioenai a kaputotan ni Ari David.​—1Cr 3:1, 5, 10, 24.