ELIFAZ

1. Inauna nga anak ni Esau, babaen iti Canaanita nga asawana a ni Ada. Innem wenno pito kadagiti annak ni Elifaz, a pakairamanan da Teman, Omar, ken Amalek, ti nagbalin a shik dagiti Edomita a tribu.​—Ge 36:4, 10-12, 15, 16; 1Cr 1:35, 36; kitaenyo ti SHIK.

2. Maysa kadagiti tallo a kakadua ni Job. (Job 2:11) Maysa a Temanita, nalabit kaputotan ti Num. 1 iti ngato, ngarud kaputotan ni Abraham ken adayo a kabagian ni Job. Isu ken dagiti putotna impasindayagda ti siribda. (Jer 49:7) Kadagiti tallo a “manangliwliwa,” ni Elifaz ti kangrunaan ken kadakkelan iti impluensia, mangipasimudaag a mabalin nga isu met ti kalakayan. Kadagiti tallo a rikus ti debate, isu ti immuna a nagsao, ken at-atiddog dagiti bitlana.

Kastoy ti panagrasrason ni Elifaz iti damo a bitlana: “Siasino nga awanan basol ti napukawen? Ket sadino ti nakapunasanen ti nalinteg?” Gapuna, ti pangleppas nga indatagna ket adda la ketdi dakes a naaramidan ni Job iti kasta immawat iti pannusa ti Dios. (Job kap 4, 5) Iti maikadua a nakaro a pammabalawna, inuyaw ni Elifaz ti sirib ni Job: “Sumungbatto aya ti mismo a masirib a tao buyogen ti naangin a pannakaammo, wenno punnuennanto aya ti tianna iti wayaway nga angin? . . . Ania a pudpudno ti ammom a saanmi nga ammo?” “Iti Mannakabalin-amin,” impasimudaag ni Elifaz a ni Job “padasenna nga ipakita ti bagina a natantan-ok.” Iti panangileppasna iti maikadua a pammadakesna kadagiti nasayaat a galad ni Job, ti Edomita iladawanna ni nalinteg a Job kas maysa nga apostata, nga agnanaed kadagiti tolda ti panagpasuksok, maysa a tao a napnuan allilaw. (Job 15) Kamaudiananna, ni Elifaz tuokenna ni Job iti maikatlo a gundaway, a siuulbod nga inakusarna iti amin a kita ti krimen​—panagkikil, panangipaidam iti danum ken tinapay kadagiti agkasapulan, ken panangirurumen kadagiti balo ken ulila.​—Job 22.

Kalpasan ti maikadua a nagubsang a bitla ni Elifaz, siuumiso a sinungbatan ni Job: “Dakayo amin makariribukkayo a manangliwliwa! Adda kadi pagnguduan ti naangin a sasao?” (Job 16:2, 3) Iti panagngudo dagiti debate, ni Jehova imbagana a mismo ken Elifaz: “Ti ungetko bimmara a maibusor kenka ken iti dua a kakaduam, ta saankayo a nagsao iti napudno maipapan kaniak kas iti panagsao ni adipenko a Job.” Naibaga ken Elifaz a rumbeng a mangidatonda iti sakripisio ket kalpasanna ikararagan ida ni Job.​—Job 42:7-9.