ELTEQUE(H)

Maysa a siudad ti Dan. (Jos 19:44) Daytoy a siudad agraman ti pagpaarabanna ket naited kadagiti Cohatita a Levita. (Jos 21:20, 23) Iti Prisma ni Taylor, impasindayag ti Asirio nga Ari Senaquerib (kapanawenan ni Ezekias, 745-717 K.K.P.) a “linakubna, kinautibona, ken sinamsamanna ti Eltequeh [Asirio, Altaqu]” kalpasan ti panangparmekna kadagiti puersa ti Egipto ken Etiopia “iti tanap ti Eltequeh.”

Kunaen idi ti kaaduan nga eskolar a nagsaad ti Eltequeh iti Khirbet el-Muqannaʽ (Tel Miqne), 36 km (22 mi) iti laud ti Jerusalem. Nupay kasta, kas resulta dagiti napalabas a panagkabakab, dayta a disso ket nainaigen iti Ekron a nadakamat iti Biblia. Ngarud, nupay awanen a pulos ti pangbigbigan iti dayta, nupay saanda a sigurado, kunaen ti dadduma nga adda ti Eltequeh idiay Tell esh-Shallaf (Tel Shalaf), 18 km (11 mi) iti amianan a daya ti Asdod.