ESMERALDA

Napateg, narimat, nasin-aw a bato ti alahas a maysa a kita ti berilo. Ti esmeralda ket buklen ti aluminum ken beryllium silicate ken sangkabassit a chromium a mangipaay iti berde a maris iti bato. Natangtangken bassit ngem iti quartz ken gagangay a masarakan iti panimbukelen a porma wenno kadagiti nagpaiduma nga innem-sikiganna a kristal.

Pagaammo dagiti esmeralda kadagiti nagkauna nga Egipcio, a nanggun-od kadagita iti Makinngato nga Egipto. Nalabit karamanda kadagiti napateg nga aruaten a naawat manipud kadagiti Egipcio sakbay la unay ti ipapanaw ti Israel manipud Egipto. (Ex 12:35, 36) Idi agangay, naikabil ti maysa nga esmeralda (Heb., ba·reʹqeth) kas maikatlo a bato iti umuna nga intar ti batbato iti “pektoral ti panangukom” ti nangato a padi. (Ex 28:2, 15, 17, 21; 39:10) Ti ari ti Tiro nailadawan a sikakawes iti abbong a naaramid iti “tunggal napateg a bato,” a pakairamanan ti esmeralda, iti naimpadtuan a dung-aw nga indung-aw ni Ezequiel.​—Eze 28:12, 13.

Ni apostol Juan, iti sirmatana maipapan iti nailangitan a trono ni Jehova, inaramatna ti esmeralda a pangiladawan iti bullalayaw nga adda iti “aglikmut ti trono.” (Apo 4:1-3) Idi nakita ni Juan ti “nasantuan a siudad, ti Baro a Jerusalem,” napaliiwna a “dagiti pamuon ti pader ti siudad naarkosan iti tunggal kita ti napateg a bato,” a ti maikapat ket esmeralda (Gr., smaʹra·gdos).​—Apo 21:2, 10, 19.