EN-ROGEL

[Ubbog (Burayok) ti Rogel (Saka)].

Burayok wenno bubon iti asideg ti Jerusalem a nagserbi a pagilasinan ti nagbedngan ti Juda ken Benjamin. (Jos 15:7; 18:16) Idiay En-rogel a dagiti managsimisim ni David a da Jonatan ken Ahimaaz nagurayda iti damag maipapan iti panagrebelde ni Absalom. (2Sm 17:17) Idi agangay, iti asideg daytoy a disso ti nangangayan ti sabali pay a rebelioso nga anak ni David a ni Adonias iti maysa a padaya tapno mangala iti suporta iti panangagawna iti trono.​—1Ar 1:9.

Umanamong ti kaaduan a ti En-rogel ket isu ti agdama a Bir Ayyub, wenno bubon ni Job. Masarakan dayta iti abagatanen ti nagsulian ti pader ti Jerusalem iti abagatan a daya, iti sakaanan ti makinlaud a deppaar ti Ginget Kidron nga agarup 100 m (330 pie) iti abagatan ti nagsabtanda iti Ginget ti Hinnom. Ti bubon ket dumanon iti maysa nga ubbog wenno burayok iti uneg ti daga, a no dadduma kalpasan ti tudo naruay ti ibukkuarna nga uray la agliplippias iti rabawna.