EFRON

1. [nagtaud iti sao a kaipapananna ti “urbon [dagiti kalakian nga ugsa]”]. Anak ni Zohar a Heteo; makinkukua iti maysa a talon idiay Macpela iti sango ti Mamre, awan sabali, idiay Hebron. Ginatang ni Abraham daytoy a talon ken Efron, agraman ti rukib a masarakan iti dayta, kas lugar a pakaitabonan ti asawana a ni Sara. (Ge 23:3-20) Nagbayad ni Abraham iti 400 a siklo a pirak (a. $880) agpaay iti daytoy a disso a pakaitabonan ti pamiliana, ket nupay adun a kaputotan ti naglabas idi agangay, kaskasdi a natukoy pay laeng dayta kas “talon ni Efron.”​—Ge 25:9; 49:29, 30; 50:13.

2. [Lugar ti Tapok]. Maysa a pantok ti bantay nga adda iti nagbaetan ti Neftoa ken Kiriat-jearim. (Jos 15:9) Nagsaad iti makin-amianan a pagbeddengan ti tribu ti Juda.

3. Agparang ti “Efron” iti 2 Cronicas 13:19 iti Masoretiko a teksto kasta met iti Griego a Septuagint ken iti dadduma pay a bersion; nupay kasta, “Efrain” ti nailanad iti notasion iti marhin iti Masoretiko a teksto.​—Kitaenyo ti EFRAIN.