MATALEK KEN MASIRIB NGA ADIPEN

Idi sinungbatan ni Jesu-Kristo ti saludsod dagiti apostol maipapan iti kaaddana iti masanguanan ken iti panungpalan ti agdama a sistema ti bambanag, inramanna ti maysa a parabulo, wenno pangngarig, maipapan iti maysa a “matalek ken masirib nga adipen.” Daytoy a matalek nga adipen ket dinutokan ti apona a mangaywan kadagiti katulongna, wenno ad-adipen ti sangakabbalayan, tapno ipaayanna ida iti taraonda. No isu ket maanamongan iti iyaay ti apona (nabatad a manipud iti maysa a panagdaliasat), magunggonaan ti adipen babaen ti pannakaisaadna nga agaywan iti amin a sanikua ti apo.​—Mt 24:3, 45-51.

Iti kapadana a pangngarig iti Lucas 12:42-48, ti adipen ket naawagan mayordomo, kayatna a sawen, agay-aywan wenno administrador iti sangakabbalayan, a naisaad nga agaywan kadagiti adipen, nupay isu ket maysa met nga adipen. Idi nagkauna a tiempo, ti maysa a matalek nga adipen ti maikabil iti kasta a saad. (Idiligyo ti Ge 24:2; kasta met ti kasasaad ni Jose iti Ge 39:1-6.) Iti pangngarig ni Jesus, ti mayordomo ket nadutokan laeng a mangaywan ken mangipaay kadagiti taraon iti grupo dagiti katulongan wenno adipen ti apo iti umiso a tiempo, ket idi agangay, gapu iti matalek ken masirib a panangaywanna iti daytoy a panagserbi, limmawa ti annongenna a mangsaklaw iti panangaywanna iti amin a sanikua ti apo. Maipapan iti kinasiasino ti “apo” (Gr., kyʹri·os), impabigbigen ni Jesus nga ik-ikutanna dayta a saad kas apo dagiti adalanna, ket adda dagiti gundaway nga isu ket inawaganda iti kasta. (Mt 10:24, 25; 18:21; 24:42; Jn 13:6, 13) Ngem agtalinaed pay laeng ti saludsod no siasino ti matuktukoy a matalek ken masirib nga adipen, wenno mayordomo, ken no ania ti iladladawan ti panangipaayna iti taraon kadagiti katulong.

Ti “adipen” ket pangmaymaysa (singular). Nupay kasta, saanna a kayat a sawen a maymaysa laeng a persona ti iladladawan ti “adipen” a maikkan iti kasta a pribilehio. Ti Kasuratan ket naglaon kadagiti pagarigan iti pannakausar ti pangmaymaysa a nagan a tumukoy iti maysa a grupo a naibilang a kasla maymaysa. Kas pagarigan, imbaga idi ni Jehova iti nasion ti Israel a maysa a grupo a naibilang a kasla maymaysa: “Dakayo dagiti saksik [pangadu (plural)], . . . ti mismo nga adipenko [pangmaymaysa] a pinilik.” (Isa 43:10) Ti “antikristo” ket maysa a grupo a buklen dagiti indibidual nga antikristo. (1Jn 2:18; 2Jn 7) Umasping iti dayta, ti “adipen” ket maysa a grupo. Madutokan daytoy iti tiempo ti panungpalan a mausar a mangipaay iti naespirituan a “taraon iti umiso a tiempo.” (Mt 24:3, 45; Lu 12:42) Idi umuna a siglo, nangipakita ni Jesus iti pagtuladan no kasano a maipaay ti naespirituan a taraon iti kongregasion Kristiano. No kasano a nagiwaras iti literal a taraon iti adu a tattao babaen ti ima ti sumagmamano nga adalan, maipaay met ti naespirituan a taraon babaen ti ima ti sumagmamano. (Mt 14:19; Mr 6:41; Lu 9:16) Sinanay ni Jesus dagiti apostol para iti akem nga awatenda kalpasan ti Pentecostes 33 K.P. kas instrumento a mangiwaras iti naespirituan a taraon. Idi agangay, tinulongan ida ti dadduma a panglakayen nga agserbi kas bagi a manarawidwid tapno masolbar dagiti isyu ken tapno maiwanwan ti panangikasaba ken panangisuro iti naimbag a damag maipapan iti Pagarian. (Ara 2:42; 8:14; 15:1, 2, 6-29) Idi natayen dagiti apostol, nangrugi ti nakaro nga apostasia. Ngem iti tiempo ti panungpalan—kas panangsurot iti pagtuladan nga impakitana idi umuna a siglo a nangpakan iti adu babaen ti ima ti sumagmamano—nangpili ni Jesus iti bassit a grupo dagiti lallaki a nadutokan iti espiritu nga agserbi kas “matalek ken masirib nga adipen,” a mangisagana ken mangiwaras iti naespirituan a taraon bayat ti kaaddana.

Dagiti adipen iti balay ket ti amin a kameng ti kongregasion Kristiano, agpada dagiti napulotan ken ti “sabsabali a karnero,” a maipapaayan iti naespirituan a taraon. (Jn 10:16) Karaman iti daytoy dagiti mangbukel iti “matalek ken masirib nga adipen” kas indibidual ta umaw-awatda met iti naespirituan a taraon. Umawatto iti kanayonan a responsabilidad dagidiay mangbukel iti matalek nga adipen no makita a matalekda iti naikari nga iyaay ti apo. Inton awatenda ti nailangitan a gunggonada ken makipagturaydan ken Kristo, dutokannanto ida a mangaywan iti “amin a sanikuana.” Makiramandanto iti dakkel nga autoridad ni Kristo idiay langit a kadua ti dadduma pay a miembro ti 144,000.​—Mt 24:46, 47; Lu 12:43, 44.