SIWAYAWAYA A BABAI

Babai nga awan iti pannakaadipen. Daytoy a termino ket naaramat a tumukoy iti asawa ni Abraham a ni Sara ken iti “Jerusalem sadi ngato.” Sipud idi tiempo a panangwayawaya ni Jehova a Dios kadagiti Israelita manipud pannakaadipen idiay Egipto ken panangtedna kadakuada iti Linteg idiay Bantay Sinai agingga iti panamagpatingga iti Linteg ti tulag idi 33 K.P., imbilang ni Jehova ti nasion ti Israel kas segundario nga asawa. (Jer 3:14; 31:31, 32) Nupay kasta, ti Linteg saanna nga impaay iti nasion ti Israel ti kasasaad kas maysa a siwayawaya a babai, ta impakitana a dagiti Israelita naipasakupda iti basol, ngarud isuda ket ad-adipen. Gapuna mayanatup unay a ti Jerusalem nga adda iti pannakaadipen idi kaaldawan ni Pablo ket impadis ti apostol iti adipen a babai a ni Agar, kamalala ni Abraham, ket ti “annak,” wenno dagiti umili, ti Jerusalem, iti anak ni Agar a ni Ismael. Maisupadi iti dayta, ti orihinal nga asawa ti Dios, ti Jerusalem sadi ngato ket, kas ken Sara, kankanayon a siwayawaya a babai, ket ti annakna siwayawayada met. Tapno ti maysa ket agbalin a siwayawaya nga anak ti Jerusalem sadi ngato, nga addaan iti ‘wayawaya,’ nasken a wayawayaan ti Anak ti Dios manipud panangadipen ti basol.​—Ga 4:22–5:1 ken ftn iti 5:1, Rbi8; Jn 8:34-36.