APRO

Pluido a pinataud ti dalem ken naurnong iti supot ti apro, bassit a sukog-peras a supot nga adda iti sirok ti makinkannawan a paset ti dalem. Ti supot ti apro makapaglaon iti agarup maysa ket kagudua nga onsa ti apro iti maysa a gundaway. Dayta ket nakaro ti kinapaitna a duyaw wenno bumerde a pluido nga ar-aramaten ti bagi iti panagrunaw. Ti apro nagbalin a nainaig iti daydiay napait wenno makasabidong, ket kasta ti pannakaaramat ti sao iti Biblia.​—Ara 8:23.

Iti panangdeskribirna iti naut-ot, napait a kapadasanna, piguratibo a sawen ni Job maipapan ti aprona kas maibukbukbok iti daga. (Job 16:1, 13) Idi agangay, ni Zofar, iti piguratibo a pagsasao, buyogen ti panangakusar nga impasagidna a ni Job nagtignay a sidadangkes ken ti “taraonna” addanto iti unegna a kas “ti apro [wenno sabidong] dagiti kobra.” Impakdaarna a ti maysa nga igam lumasatto a “sumalpot iti [supot ti] aprona.” (Job 20:1, 14, 25) Ti Hebreo a sao a naipatarus nga “apro” ket nainaig iti sao a maipaay iti “napait.”​—De 32:32; Job 13:26.

Ti Griego a sao maipaay iti apro ket kho·leʹ.​—Kitaenyo ti MAKASABIDONG A MULA.