GAMALIEL

[mabalin a, Panggunggona (Maiparbeng a Panangtrato) ti Dios].

1. Ti anak ni Pedazur a kameng iti tribu ni Manases, ken ti panguluen ti tribuna. (Nu 1:10, 16) Maysa ni Gamaliel kadagiti 12 a panguluen nga intuding ni Jehova a tumulong kada Moises ken Aaron a mangbilang iti annak ti Israel, manipud 20 ti tawenna nga agpangato, a maipaay iti buyot. (Nu 1:1-4, 10) Idadauluanna ti buyot ti tribuna, a paset ti tallo a tribu a benneg ti pakarso ni Efraim. (Nu 2:18, 20; 10:23) Kalpasan ti pannakaipasdek ti tabernakulo, nagidiaya dagiti panguluen, nga imbilin ni Jehova a mausar dagita a pagserbi iti tolda ti gimong. Nangidatag met ni Gamaliel iti daton idi maikawalo nga aldaw maipaay iti inagurasion ti altar.​—Nu 7:1-5, 10, 11, 54-59.

2. Kameng ti Sanhedrin, maysa a Fariseo, ken mannursuro iti Linteg, nga iti sakaananna ket nasursuruan ni apostol Pablo sigun iti kinainget ti Linteg dagiti inapo. (Ara 5:34; 22:3) Ibilang ti kaaduan a ni Gamaliel ket isu met laeng ni Gamaliel a Panglakayen. Mararaem unay idi ni Gamaliel a Panglakayen, yantangay isu ti kaunaan a naipaayan iti titulo a “Rabban.” Daytoy nadayaw a titulo ket nangatngato pay ngem iti “Rabbi.” Maipapan kenkuana kunaen ti Mishnah (Sotah 9:15): “Idi natay ni Rabban Gamaliel a Panglakayen, nagpatingga ti dayag ti Linteg ket natay ti kinadalus ken panagayunar.” (Impatarus ni H. Danby) Nabatad a nalawa ti panagpampanunot ni Gamaliel ken saan a panatiko dagiti panangmatmatna, kas ipasimudaag ti impaayna a pammatigmaan idi a ni Pedro ken ti dadduma pay nga apostol naisaklangda iti Sanhedrin. Babaen ti panangdakamatna kadagiti pagarigan iti naglabas, impakita ni Gamaliel a nainsiriban a saanda a bibiangan ti trabaho dagiti apostol sana innayon: “No daytoy a gandat wenno daytoy nga aramid ket aggapu kadagiti tattao, maduprakto dayta; ngem no aggapu iti Dios, saanyonto a kabaelan a dupraken ida . . . amangan ta iti kinaagpaysuanna masarakankayo a mannakilaban iti Dios.”​—Ara 5:34-39.