GEHAZI
Katulongan ni Eliseo a mammadto.
Idi pampanunoten ni Eliseo no ania ti mabalinna nga aramiden maipaay iti managpadagus a babai a Sunamita, ni Gehazi ti nangipakaammo iti apona a ti babai ket awanan anak ken lakayen ti asawana. Iti kasta imbaga kenkuana ni Eliseo nga isu masupapakanto iti maysa nga anak a lalaki. Sumagmamano a tawen kalpasanna, nagsakit ken natay ti namilagruan ti pannakaipaayna nga ubing. Iti kasta, ti Sunamita nagsakay iti asna tapno kitaenna ni Eliseo idiay Bantay Carmelo ket iniggamanna dagiti saka ti mammadto. Idi nakitana daytoy, pinadas ni Gehazi a paadaywen ngem nabagaan a bay-anna ti babai. Kalpasan a nakapagsao ti Sunamita, madagdagus nga imbaon ni Eliseo nga umun-una ni Gehazi a mapan iti ubing, bayat a simmaruno ni Eliseo ken ti babai. Idi agturturongda sadiay, sinabet ida ni Gehazi, a mangipadpadamag a, nupay imparabawna ti sarukod ni Eliseo iti rupa ti ubing, “ti ubing saan a nagriing.” Nupay kasta, di nagbayag kalpasan ti isasangpetda, pinagungar ni Eliseo ti anak ti Sunamita.—2Ar 4:12-37.
Idi agangay, gapu ta naikeddeng a dumteng ti pito a tawen a nakaro a bisin, insingasing ni Eliseo a ti Sunamita ken ti sangakabbalayanna agtaengda kas ganggannaet iti sadinoman a mabalin a pagyananda. Kalpasan ti nakaro a bisin, ti Sunamita nagsubli idiay Israel manipud Filistia ket immasideg iti ari nga impakaasina a maisubli kenkuana ti balay ken talonna. Nairanrana nga iti daytoy a gundaway isalsalaysay ni Gehazi iti ari no kasano a pinagungar ni Eliseo ti anak daytoy a babai. Idi nangngegna ti mismo a salaysay ti Sunamita maipapan iti panagungar, imbilin ti ari a maisubli kenkuana ti isuamin, agraman amin nga imbunga ti talonna bayat ti kaawanna.—2Ar 8:1-6.
Kinaagum iti gunggona ti nakatnagan ni Gehazi. Nainaig daytoy iti pannakapaimbag ni Naaman a Sirio. Nupay pinagkedkedan ni Eliseo nga awaten ti sagut manipud ken Naaman maipaay iti pannakapaimbag ti kukutelna (2Ar 5:14-16), inaguman ni Gehazi ti sagut ket inrasonna a maitutop laeng nga awaten daytoy. Ngarud nagtaray a simmurot ken Naaman, ket iti nagan ni Eliseo, nagkiddaw iti maysa a talento a pirak (aggatad iti $6,606) ken dua a pagsukatan a kawes, iti panaginkukunana nga agpaay daytoy iti dua nga agtutubo a lallaki nga annak dagiti mammadto a kasangsangpetda manipud nakabambantay a rehion ti Efraim. Siraragsak a nangted kenkuana ni Naaman iti saan laeng a maysa no di ket dua a talento a pirak, kasta met ti dua a pagsukatan a kawes, ket impaawitna ti sagut iti dua kadagiti katulonganna maipaay ken Gehazi. Idiay Ofel, innala ni Gehazi ti sagut manipud iti im-ima dagiti katulongan, pinapanawna ida, indulinna ti sagut iti balayna, sa dimmatag nga ima-ima iti sanguanan ni Eliseo. Inlibakna pay nga adda napananna idi napagsaludsodan: “Sadino ti naggapuam, Gehazi?” Kas nagbanaganna, nagkukutel ni Gehazi. Ngarud gapu iti kinaagumna, a nabuyogan iti kinamanangallilawna, napukaw ni Gehazi ti pribilehiona nga agtultuloy nga agserbi kas katulongan ni Eliseo, malaksid pay ti panagkukutelna a mismo ken ti kaputotanna.—2Ar 5:20-27.