GERSONITA, DAGITI
[Ken (Kukua ni ) Gerson].
Dagiti kaputotan ni Gerson, wenno Gersom—ti immuna kadagiti tallo a nainaganan nga annak ni Levi—babaen iti dua nga annakna a da Libni ken Simei. (1Cr 6:1, 16, 17) Dagiti Gersonita ket maysa kadagiti tallo a dadakkel a grupo dagiti Levita. Iti damo a panagsensus idiay let-ang, agdagupda iti 7,500 a lallaki nga agedad iti maysa a bulan nga agpangato. Dagidiay agedad iti 30 agingga iti 50 a tawen a nagserbi iti tabernakulo ket agdagup iti 2,630 a lallaki. (Nu 3:21, 22; 4:38-41) Karaman iti panagserbi dagiti Gersonita idiay let-ang ti panangaywan iti tabernakulo (ti tolda ti gimong), iti nadumaduma nga abbongna, iti tabing iti pagserkan ti tabernakulo, kadagiti balengbeng ti paraangan, iti tabing ti pagserkan ti paraangan, ken kadagiti singdan ti tolda. (Nu 3:23-26; 4:21-28; Ex 26:1, 7, 14, 36; 27:9, 16) Idi addada idiay let-ang, nagpakarsoda iti makinlaud a sikigan ti tabernakulo. Nagpakarso ti tallo a tribu a benneg ti Efraim iti likudanda, nga adayo iti tabernakulo. (Nu 3:23; 2:18) Idi nangidatag dagiti panguluen ti Israel iti 6 a naabbongan a kareson ken 12 a toro agpaay iti panagserbi iti tabernakulo, inted ni Moises ti 2 a kareson ken 4 a toro iti annak ni Gerson. (Nu 7:1-7) No umakarda iti pagpakarsuan, agmartsa dagiti Gersonita a kadua dagiti Merarita iti nagbaetan nga adda iti makinsango a tallo a tribu a benneg ti Juda ken ti tallo a tribu a benneg ti Ruben.—Nu 10:14-20.
Manipud kadagiti teritoria ti Manases, Isacar, Aser, ken Neftali, 13 a siudad nga addaan pagpaaraban ti naited kadagiti Gersonita kas bingay. Ti Kedes, idiay Galilea, ken Golan, idiay Basan, a naituding kadakuada, ket dua kadagiti innem a siudad a pagkamangan nga agpaay iti nasion. (Jos 21:27-33) Idi inorganisar manen ni David dagiti Levita, ti rebbengen a naited iti sumagmamano a Gersonita ket dagiti annongen mainaig iti panagkanta ken iti paggamengan. (1Cr 6:31, 32, 39-43; 23:4-11; 26:21, 22) Idi kaaldawan ni Ari Ezekias, dagiti Gersonita ket karaman kadagiti Levita a nakipaset iti trabaho a panangdalus iti templo.—2Cr 29:12-17.