HABAKUK

[Nasged a Panangabrasa].

Hebreo a mammadto ti Juda ken mannurat ti libro ti Biblia a napanaganan iti naganna. (Hab 1:1; 3:1) Manipud iti pangserra a sasao ti libro (“Iti mangiwanwanwan kadagiti pagtokarko nga adda kuerdasna”) ken iti dung-aw iti kapitulo 3, naipasimudaag a ni Habakuk ket Levita a musikero ti templo. Ngem saan nga ipasigurado dayta ti sasao a sumaruno iti Habakuk 3:19, ket adda met dagiti dung-aw nga inyebkas dagiti indibidual a saan a Levita. (2Sm 1:17, 18) Nupay adda nadumaduma a tradision maipapan ken Habakuk, saan a mapagtalkan dagitoy, ket ti mismo a Kasuratan awan ipaayna nga impormasion maipapan kadagiti nagannak, tribu, kasasaad ti biag, wenno ipapatay daytoy a mammadto. Ti pammaneknek a linaon ti libro ti Habakuk kasla ipasimudaagna nga isu nagipadto bayat ti nasapa a paset ti panagturay ni Jehoiaquim, mabalin a sakbay a naparmek ni Nabucodonosor ti buyot ti Egipto idiay Carquemis idi 625 K.K.P.