HALLEL

Kanta ti panangidaydayaw ken Jehova. Ti Salmo 113 agingga iti 118 buklen ti pagaammo iti Judio a sursurat kas “Hallel ti Egipto.” Sigun iti Mishnah, daytoy a Hallel nakanta iti templo ken kadagiti sinagoga iti okasion ti Paskua (Pesahim 10:5-7) ken kadagiti piesta ti Pentecostes, Abong-abong, ken Panangidedikar (Sukkah 4:8; Taʽanit 4:5). Iti panangrambak iti Paskua iti pagtaengan, ti umuna a paset daytoy a Hallel (mabalin a ti Salmo 113 [sigun iti Eskuelaan ni Shammai] wenno ti Salmo 113 ken 114 [Eskuelaan ni Hillel]) ket naisawang kalpasan a naiparukpok ti maikadua a kopa ti arak ken nailawlawag ti kaipapanan ti Paskua. Naipatingga ti Hallel iti maikapat a kopa ti arak. Ti “Naindaklan a Hallel” (maibilbilang no maminsan kas isu ti Salmo 136 laeng, no dadduma Salmo 120-136, wenno Salmo 135:4–136:26) naikuna a nakanta kadagiti narag-o nga okasion ken babaen kadagidiay nangaramat iti maikalima a kopa ti arak iti panangrambak iti Paskua.