HASUM

Inapo a pannakaulo ti maysa a pamilia dagiti Israelita, a dagiti kameng dayta ket nagsubli a kadua ni Zorobabel manipud Babilonia idi 537 K.K.P. (Esd 2:1, 2, 19; Ne 7:22) Idi dimteng ni Esdras idiay Jerusalem idi 468 K.K.P., pito a lallaki kadagiti “annak ni Hasum” ti nangpapanaw iti ganggannaet nga assawada a babbai. (Esd 10:33, 44) Ti pannakabagi ti pamilia wenno ti maysa nga agnagan Hasum ket nakatakder idi iti makannigid ni Esdras bayat a basbasaenna ti libro ti Linteg kadagiti Israelita a naguummong iti publiko a plasa iti sango ti Ruangan ti Danum ti Jerusalem. (Ne 8:1-4) Kasta met, maysa a pannakabagi ti balay ni Hasum ti nangpatalged babaen iti selio iti “mapagpiaran nga urnos” a nabukel bayat ti kinagobernador ni Nehemias.​—Ne 9:38; 10:1, 14, 18.