HAZARMAVET

[Paraangan (Purok) ni Patay].

Maysa a kaputotan ni Noe babaen kada Sem ken Joctan. (Ge 10:1, 21, 25, 26; 1Cr 1:20) Patien ti kaaduan a dagiti kaputotan ni Hazarmavet nagyanda iti rehion ti Hadhramaut iti makin-abagatan nga Arabia. Naikuna a ti Hadhramaut ket nainaig iti Hazarmavet gapu iti panagkaasping dagiti konsonante iti orihinal a nagnagan a Hebreo ken Arabiko. Saan a nalawag dagiti geograpiko a beddeng ti Hadhramaut. Mapattapatta a 880 km (550 mi) ti kaatiddogna ken 240 km (150 mi) ti kaakabana. Pangakikiden ti tanap iti igid ti baybay, ket kalpasanna pumasdok ken ngumato daytoy a daga, iti kasta maporma ti maysa a nabato a nangato a lantag a ti promedio a kangatona adda iti nagbaetan ti 900 ken 1,200 m (3,000 ken 4,000 pie). Iti daytoy a nangato a lantag, lumasat ti adu a nauneg a naapres a ginget a naintaran kadagiti teppang. Nakadamdam-eg dagitoy a ginget. Naruay dagiti agtubo a palma ken datiles; adda pagaraban dagiti karnero, kamelio, asno, ken bakbaka; ket dagiti mula nga agtubo sadiay ramanenda ti mijo, alfalfa, indigo, kapas, ken mais. Ti Wadi Hadhramaut ti kangrunaan kadagiti naapres a ginget. Ti agus daytoy a karayan mangrugi iti agarup 480 km (300 mi) iti uneg manipud iti makinlaud a kosta ti Peninsula ti Arabia ken in-inut nga agsikko nga agpadaya iti agarup 640 km (400 mi), nga iti kamaudiananna agayus iti Baybay ti Arabia kas ti Wadi Masila (ti nagan a naaramat a tumukoy iti makimbaba nga agusna). Ti rehion ti Hadhramaut napateg ti akemna idi un-unana gapu iti panagkomersiona iti insienso. Ngem dagiti sigud a naruay a kayo nga olibano manmanoda itan sadiay.