HAZAZON-TAMAR

[Graba [Bakras] ti Kayo a Palma].

Siudad a nagnaedan dagiti Amoreo ken mabalin nga adda iti asideg ti Nababa a Tanap ti Siddim. Ni Ari Kedorlaomer ken dagiti kaaliadona pinarukmada dagiti Amoreo nga agnanaed iti Hazazon-tamar. (Ge 14:5-8) Adu a siglo kalpasanna, dagiti nagtitipon a puersa ti Moab, Ammon, ken ti kabambantayan a rehion ti Seir immayda a maibusor iti Juda, a dimmalanda iti “Hazazon-tamar, kayatna a sawen, En-gedi.” (2Cr 20:2, 10, 11) Patien ti adu nga eskolar a ti panangtukoy ti Genesis ipatuldona ti maysa a lugar a pangadaywen iti abagatan ti En-gedi ket ngarud ibilangda ti sasao a “kayatna a sawen, En-gedi,” kas nainayon iti naud-udi a tiempo. Nupay kasta, ti nagan a “Hazazon-tamar” ket agparang a nataginayon iti Wadi Hasasa (Nahal Hazezon) agarup 10 km (6 mi) iti amianan ti naikuna nga ayan ti En-gedi. Kasta met, ti kaipapanan ti Hazazon-tamar ket maibagay iti rehion ti En-gedi, a dineskribir ni Josephus kas lugar a pagtubtubuan “dagiti kasayaatan a kayo a palma.” (Jewish Antiquities, IX, 7 [i, 2]) Gapuna, no ti teksto iti Genesis tuktukoyenna ti naab-abagatan pay a disso, mabalin nga adda dua a lugar a naawagan iti Hazazon-tamar: ti maysa ket ti En-gedi; ti sabali ket mabalin a ti disso iti abagatan a laud ti Natay a Baybay a maawagan laeng iti Tamar.​—Eze 47:19; 48:28.