SASANTO

Dagidiay nadalus, nangnangruna no maipapan iti naespirituan wenno iti moral; ipasimudaagna met ti tattao a nailasin maipaay iti panagserbi iti Dios, idiay langit wenno ditoy daga.

Yantangay katan-okan iti kinadalus ken kinalinteg, ni Jehova a mismo Daydiay Kasasantuan. (Os 11:12) Isu masansan a maawagan “Daydiay Santo ti Israel.” (2Ar 19:22; Sal 71:22; 89:18) Kuna ni apostol Juan kadagiti padana a kameng ti kongregasion Kristiano: “Addaankayo iti pannakapulot manipud iti daydiay nasantuan.” (1Jn 2:20) Naawagan ni Jesu-Kristo kas “daydiay nasantuan ken nalinteg” a natukoy iti Aramid 3:14. Dagiti anghel ni Jehova sadi langit nasantuanda, naan-anay a naipaay iti panagserbi iti Dios, nadalus ken nalinteg.​—Lu 9:26; Ara 10:22.

Kadagidi Kadaanan a Tiempo. Dagiti tattao ditoy daga, a nailasin maipaay iti panagserbi iti Dios, naawaganda met iti ‘sasanto.’ (Sal 34:9) Ti Israel, a naiserrek iti tulag a pannakirelasion iti Dios, nagbalin a naisangsangayan a sanikuana ket, kas maysa a nasion, nasantuan kenkuana. Dayta ti makagapu a ti nasion aglak-am iti pannakatulaw ken di pananganamong ni Jehova no adda maysa iti dayta a nasion a mangyugali iti kinarugit wenno iti panagaramid iti dakes, malaksid no naaramid ti tignay a mangikkat iti dayta. Ti naagum ken nasukir a ni Acan ket maysa a pagarigan; gapu iti basolna, ti Israel naglak-am iti rigat agingga nga isu natakuatan, ket iti kasta isu naubor agingga a natay.​—Jos 7.

Ni Aaron, a napulotan iti nasantuan a pangpulot a lana kas nangato a padi ti nasion, ket santo iti naisangsangayan ken naun-uneg a kaipapanan. (Sal 106:16) Gapuna, nainget unay dagiti makalikaguman iti akemna. (Le 21:1-15; imutektekanyo met dagiti mabalin a pakadiskualipikaran ti papadi, iti Le 21 bersikulo 16-23; kitaenyo ti NANGATO A PADI.) Ti maysa a basol iti biang ti nangato a padi (kas pagarigan, ti biddut iti panangukom iti maysa a banag) mabalin a pakaigapuan ti panagbasol ti ili ket kasapulan a maabbongan babaen ti pannakaisakripisio ti maysa nga urbon a toro, ti isu met laeng a sakripisio a makalikaguman maipaay iti biddut ti intero a gimong.​—Le 4:3, 13, 14.

Kristiano a Sasanto. Dagiti tattao a naiyeg iti pannakirelasion iti Dios babaen iti baro a tulag ket nasantipikar, nadalusan, ken nailasin maipaay iti naipamaysa a panagserbi iti Dios babaen iti “dara ti tulag,” ti naiparukpok a dara ni Jesu-Kristo. (Heb 10:29; 13:20) Iti kasta, naibilangda a “sasanto” (kitaenyo met ti KJ ken dadduma pay a bersion). Gapuna, saanda nga agbalin a “sasanto” babaen iti bilin ti maysa a tao wenno organisasion, no di ket babaen iti Dios, a mangiserrek kadakuada iti tulag a pannakirelasion kenkuana babaen iti dara ni Jesu-Kristo. Ti termino a “sasanto” agaplikar kadagidiay amin a kasta ti pannakaiyegda a makikaykaysa ken makipagtawid ken Kristo, saan nga iti sumagmamano laeng a naibilang nga addaan iti nagpaiduma a kinasanto. Nayaplikar met dayta kadakuada iti Biblia nanipud panangrugi ti nasantipikar a danada ditoy daga, a saan a kasapulan nga urayen dayta agingga iti kalpasan ti ipapatayda. Kuna ni Pedro a masapul a nasantuanda agsipud ta ti Dios nasantuan. (1Pe 1:15, 16; Le 11:44) Amin dagiti naespirituan a kakabsat ni Kristo kadagiti kongregasion masansan a naawaganda iti “sasanto.”​—Ara 9:13; 26:10; Ro 1:7; 12:13; 2Co 1:1; 13:13.

Kas “asawa” ni Kristo, ti intero a kongregasion nailadawan a sikakawes iti nasileng, nadalus, ken napino a lienso, nga itakderanna “dagiti nalinteg nga aramid dagiti sasanto.” (Apo 19:7, 8) Bayat nga addada ditoy daga, nakita iti sirmata a ti simboliko a napolitikaan nga “atap nga animal” ni Satanas a Diablo ket makigubgubat kadakuada. (Apo 13:3, 7) Iti kasta, nakaro ti pannakasubok ti panagibtur dagiti sasanto, ngem agballigida babaen ti panangalagadda kadagiti bilin ti Dios ken iti pammati ken Jesus.​—Apo 13:10; 14:12.

Ti namnamada. Iti pumadpada a sirmata, nakita ni Daniel ti maysa nga atap nga animal a makigubgubat kadagiti sasanto ti Dios; simmaruno iti daytoy ti maysa nga eksena iti pangukoman nga iti dayta “ti Kadaanan iti Al-aldaw” nangted iti panangukom a pabor kadagiti sasanto ket naipaayanda iti di nakedngan ti kapautna a Pagarian, “ti pagarian ken ti panagturay ken ti kinadaeg dagiti pagarian iti baba ti amin a langlangit.”​—Da 7:21, 22, 27.

Dagitoy a “sasanto” saanda nga ipakat ti naarian nga autoridad bayat nga addada ditoy daga no di ket masapul nga urayenda ti pannakaikaykaysada ken Kristo idiay langit. (Efe 1:18-21) Masapul nga umuna nga ‘agballigida.’ (Apo 3:21; idiligyo ti Apo 2:26, 27; 3:5, 12.) Agakemda kas papadi ken makipagturayda ken Kristo kas ar-ari bayat ti Sangaribu a Tawen a Panagturayna. (Apo 20:4, 6) Kunaen ni apostol Pablo a dagiti sasanto ukomendanto ti lubong, kasta met dagiti anghel, ket nabatad a makiramanda iti panangipakat iti panangukom kadagiti nadangkes.​—1Co 6:2, 3; Apo 2:26, 27.

Iraraut iti “Pakarso Dagiti Sasanto.” Iti Apocalipsis 20:7-9, naipadto a ni Satanas a Diablo idauluannanto dagiti nasion iti gubat maibusor iti “pakarso dagiti sasanto ken ti ay-ayaten a siudad” kalpasan ti panagngudo ti sangaribu a tawen a panagturay ni Kristo. Ti padto nabatad a tumukoy iti naindagaan a panagrebelde iti kinasoberano ti pagarian ti Dios iti intero a daga, a dayta ket iraraut kadagiti “sasanto.” Iti daytoy a konteksto, nabatad a dagitoy dagidiay kameng ti naisubli a sangatauan a mangtagtaginayon iti kinatarnawda iti Dios ken iti Mesianiko nga Arina.​—Kitaenyo ti KINASANTO.