HOREO
Tattao nga agnanaed iti bambantay ti Seir idi tiempo dagiti patriarka. Naawaganda iti Biblia nga “annak ni Seir a Horeo.” (Ge 36:20, 21, 29, 30) Dagiti Edomita ket “inikkatanda ida iti sanikua ket tinalipuposda ida iti sanguananda ket nagnaedda iti lugarda.”—De 2:12, 22.
Iti Genesis 36:2, iti Masoretiko a teksto, naawagan iti “Zibeon a Heveo” ti apong ti maysa kadagiti assawa ni Esau. Nupay kasta, iti bersikulo 20 ken 24, isu ket naipakita a kaputotan ni Seir a Horeo. Ti “Horeo” ket mabalin a kaipapananna laeng ti “agnanaed iti kueba,” manipud Hebreo a chor (“abut”). Daytoy ti rason a ni Zibeon ket maysa a Heveo yantangay agnanaed idi iti kueba.
Iti Josue 9:7, ti Griego a Septuagint awaganna dagiti Gabaonita kas “Chorreano” (Horeo) imbes a “Heveo,” ngem nalawag a daytoy ket biddut, gapu ta dagiti Gabaonita ket karaman kadagiti pito a nasion ti Canaan a naikeddeng a madadael (ngem saan a karaman dagiti Horeo). Ti adda iti Masoretiko a teksto ket “Heveo.”—Jos 9:22-27; De 7:1, 2.
Dagiti Hurriano. Patien itan ti adu a moderno-aldaw nga eskolar nga iti kinaagpaysuanna dagiti Horeo ket umili nga aw-awaganda iti Hurriano. Daytoy a kapanunotan ket kangrunaan a naibatay iti panagkakaasping dagiti pagsasao, nangnangruna iti panagkakaasping ti nagnagan dagiti indibidual iti kadaanan a taptapi a natakuatan kadagiti laeng naglabas a tiempo iti nalawa a disso a manipud agdama a Turkia nga agingga iti Siria ken Palestina. Gapuna patienda a dagiti “Hurriano” ket naawaganda iti Horeo idi agangay. Ngem paliiwenyo dagiti komento ni E. A. Speiser iti The World History of the Jewish People (1964, Tomo 1, p. 159). Kastoy ti umuna nga argumentona:
“Napaneknekan a dagiti met Jebuseo iti Biblia ket Hurriano. Nagtaudda iti ganggannaet a kaputotan (Uk. 19:12), maysa a deskripsion a paneknekan ti Jebuseo a personal a nagan nga Awarnah (II Sam. 24:16, Kethib). Ti maysa nga agturay iti Jerusalem idi maika-14 a siglo, wenno ti Jebus, ket adda pudpudno a Hurriano nga elemento a Hepa iti naganna. Ngarud agpadpada a dagiti Jebuseo ken dagiti Heveo—dua kadagiti naitampok a nasion sakbay ti panawen dagiti Israelita—ket benneg laeng ti nagwaras a grupo dagiti Hurriano.” Ngem kalpasanna innayonna:
“Nupay kasta, masapul ita a balbaliwan ti maysa a kangrunaan a punto ti konklusion a nadakamat iti ngato. Ti kasapulan a panagbalbaliw saanna nga apektaran ti kasasaad dagiti lokal a Hurriano kadagidi nagkauna a tiempo ti Biblia; ngem apektaranna ti dagus a panangikuna a dagiti Hurriano ket isu dagiti Horeo. . . . Awan ti pammaneknek ti arkeolohia a nagnaed dagiti Hurriano idiay Edom wenno Transjordan. Ngarud ti termino iti Biblia a Hori—a kas met laeng iti Cus—ket mabalin nga adda panawen a naaramat a mangipasimudaag iti dua a nagduma ken agsupadi a kaipapanan.”
Ngarud, nupay kayat nga usaren dagiti eskolar ti nagan a saan a masarakan iti Biblia a pangawag kadagiti nagwaras nga umili, nga ibagbagada a pakairamanan dagiti Horeo, Heveo, ken Jebuseo, bigbigenda kas maysa a pagarigan nga awan ti pammaneknek a nagnaed dagiti Hurriano idiay Edom, a nagnaedan dagiti Horeo iti Biblia. Gapuna, idi awagan ti Biblia iti “Horeo” dagiti agnanaed iti Seir nga immun-una ngem kadagiti Edomita, nabatad a dayta a nagan ket tumukoy laeng iti dayta a grupo idiay Seir.