HUR

1. Kaputotan ni Juda; anak da Caleb ken Efrat; apong ti nasigo nga agtrabaho a ni Bezalel. Mabalin a nagnaed idiay Betlehem ti dadduma kadagiti kaputotan ni Hur. (Ex 31:2; 35:30; 38:22; 1Cr 2:19, 20, 50, 51, 54; 4:1-4; 2Cr 1:5) Nalabit nga isu met laeng ti Num. 2.

2. Maysa a mabigbigbig a kadua da Moises ken Aaron. Idi a rinaut dagiti Amalekita ti Israel, a nabiit pay a pimmanawda iti Egipto, kimmuyog ni Hur kada Moises ken Aaron iti tapaw ti maysa a turod a sadiay tinengngelda ken Aaron dagiti sitatag-ay nga ima ni Moises agingga a pinagballigi ni Jehova ti Israel maibusor kadagiti Amalekita. (Ex 17:8-13) Iti maysa a gundaway di pay unay nabayag kalpasan dayta, idi a simmang-at da Moises ken Josue iti Bantay Sinai tapno awatenda dagiti kanayonan pay a Linteg, imbatida da Hur ken Aaron a mangaywan iti pakarso. (Ex 24:12-14) Nalabit isu met laeng ni Hur (Num. 1) nga apong ti nasigo nga agtrabaho iti tabernakulo a ni Bezalel. Inlanad ni Josephus a ni Hur ket asawa ni Miriam, ngem awan ti aniaman nga ibaga ti Biblia maipapan itoy.​—Jewish Antiquities, III, 54 (ii, 4).

3. Maysa nga ari ti Midian, maysa kadagiti lima nga inturayan ti Amoreo a ni Ari Sihon agingga nga inabak ti Israel ni Sihon, idi agturturongdan iti Naikari a Daga. (Jos 13:15, 16, 21; Nu 21:21-24) Kalpasanna, nabatad a nakialiansa ni Hur ken ti uppat a kailianna iti ari ti Moab a ni Balak a maibusor iti Israel. (Nu 22:1-7) Idi agangay, kas iti imbilin ni Jehova, nakigubat dagiti Israelita kadagiti Midianita ket pinapatayda ni Hur kasta met ti uppat a kaaliansana nga ar-ari a Midianita ken ti naagum a mammadto a ni Balaam.​—Nu 31:1-8.

4. Ama ti dinutokan ni Solomon a diputado iti taraon nga agnanaed iti kabambantayan a rehion ti Efraim.​—1Ar 4:7, 8.

5. Ama ni Refaias. Ti anak ni Hur a ni Refaias ket timmulong ken Nehemias a mangbangon manen iti pader ti Jerusalem.​—Ne 3:9.